Уопсастыба

Бу күннэргэ интэриниэт сититимигэр биллэр урбаанньыт Руслан Федотов Өлүөнэ өрүһү туоратар «Сулус» хампаанньаны өйөөн, катердаах уолаттарга «Хивус-10» салгын олбохтоох суудунаны сыыйа төлөһөргө дуогабардаах туттарда диэн иһитиннэрии киэҥник тарҕанна. Руслан Еремеевиһы Мэҥэ Хаҥалас улууһун олохтоохторо ытыктыыр, ылынар киһилэрэ, элбэхтэ алтыспыт, көмөлөһар, өйөнөр эрэллээх урбаанньыттара. Кини 2018-2023 сылларга Ил Түмэн VI ыҥырыытын дьокутаатынан талыллан үлэлээбитин бэлиэтиир оруннаах.

Улусмедиа саайтыгар таһаарбытынан, «Сулус» хампаанньа аатыттан дириэктэр Сергей Владимиров:

— Мантан күһүн өрүскэ дьону харгыһа суох таһар үлэни тэрийэрбитигэр дьоһун көмө буолла. «Хивуһу» собуоттан ылбыт сыанатыгар, бырыһыана суох итиэннэ бэйэтин өрүскэ тиэйэн киллэрэр-таһаарар бырысыаптаах, редуктордаах, эрэмиэннэрдээх, о.д.а. саппаас чаастардаах биэрдэ, — диэн махтанар.

Бу тыын суолталаах боппуруоска норуот сүрэхтиин-быардыын долгуйар. Онон урбаанньыт Руслан Еремеевич Федотов үтүө дьыалатын сыаналаан, үөрүүлэрэ муҥура суох. Күһүҥҥү хахсаакка дьон-сэргэ уочаракка тоҥо-хата туруо суоҕа этэ.

ххх

Оттон “Эркээйи” хаһыат саайтыгар Марелла Баишева суруйарынан, Аллараа Бэстээх – Дьокуускай хайысханан саҥа «Сулус» тэрилтэ Өлүөнэ Эбэни туоратар үлэҕэ ылсан, дьону 500 солкуобайга таһыыны саҕалаабыта бэҕэһээ, атырдьах ыйын 26 күнүгэр, биир ыйа буолла.

Саҥа дьыаланы саҕалаабыт уолаттары дьон-сэргэ үөрэ көрсөн, өйөөн, айанньыттарга табыгастаах буоларыгар аналлаах тутуулар элбэх тэрилтэ итиэннэ биирдиилээн дьон кыттыылаах  субуотунньугунан оҥоһуллубуттара. Үтүө холобуру салҕаан, ватсап-бөлөх арыйан, Майатааҕы «Түмэн» уопсастыбаннай холбоһук салайааччыта Мария Лукина көҕүлээһининэн  уопсастыбаннас катердаах уолаттарбыт иннилэрин хоту баран иһэллэригэр туһалаах тэриллэри, бастакынан, ирдэбил быһыытынан видео регистратор ылыналларыгар күүс-көмө буоллубут. Салгыы бэйэбит испититтэн этии киирэн, уоту-күөһү холбуур генераторга көмө хомуйдубут. Бу бэйэ баҕатынан  көмөлөһөр бөлөх буолан, ким төһөнү биэрэрэ бэйэтин көҥүлэ этэ.

Харчыны биллэр уопсастыбанньык, анал байыаннай дьайыы кыттыылаахтарыгар харысхал сиэккэни баайар бөлөх салайааччыта Евдокия Семенова хомуйда. Кини күнүнэн ким, хантан, төһөнү ыыппытын испииһэктээн бөлөххө сырдатан истэ. Манна  майалары сэргэ, улууспут нэһилиэктэриттэн  итиэннэ Томпоттон, Тааттаттан, Чурапчыттан, Уус Алдантан, о.д.а. улуустартан биирдиилээн дьон кыттан, Илин эҥээрдэр кыһалҕалаах боппуруостарыгар көмө буоллулар. «Түмэн» уопсастыбаннай холбоһуктан Анна Павлова салайааччылаах «Райпо бэтэрээннэрэ», Розалия Шарина салайааччылаах «Сыдьаай» үҥкүү бөлөҕө, Евдокия Семенова салайааччылаах «Түһүлгэ» фольклор бөлөҕө, Дьокуускайтан Александра Кычкина  салайааччылаах «Мэҥэ кыргыттара» түмсүүлэр көмөҕө  кыттыстылар. Ватсап-бөлөххө  дьон-сэргэ сүргэтэ көтөҕүллэн, «Сулустарга» анаан хоһооннор айыллан тарҕаннылар, уолаттарбыт салгыы үүнэн-сайдан иһэллэригэр баҕа санаа бастыҥа этилиннэ.

Атырдьах ыйын 26 күнүгэр Майа баһылыгын солбуйааччы Дмитрий Игнатьев, «Түмэн» сүбэтин чилиэннэрэ Екатерина уонна Федор Баишевтар, Евдокия Семенова Аллараа Бэстээх биэрэгэр киирэн «Сулус» тэрилтэ салайааччытыгар Сергей Владимировка көмө харчыны кытта алгыстаах Махтал суругу үөрүүлээх быһыыга туттардылар. Сергей Васильевич соһуччу үөрүүнү бэлэхтээбит бар дьонугар махталын биллэрдэ.

“Сулус” тэрилтэ Өлүөнэ Эбэҕэ үлэлээбит бастакы күнүттэн өрүһү туоратыыга сиэрдээх  сыананы олохтоон норуот махталын, тапталын, эрэлин  ылыан ылла. Бу күннэргэ саҥа үөрэх дьыла чугаһаан, оҕолоох элбэх дьон айанныыр эбит. Аҕыйах катер сылдьар буолан уочараттаах. Ону ол диэбэккэ, дьон холкутук уочараттаан тураллара, киирэргэ-тахсарга бэйэ-бэйэлэригэр көмөлөһөллөрө — «сулустарга» толору эрэнэллэрин, махталлаах сыһыаннарын көрдөрөр. Өрүһү туоруур айан 12-лэригэр диэри саастаах оҕолорго босхо буолан, төрөппүттэргэ улахан өйөбүл буолар.

Катердаах ыччаттарбыт бу курдук ылсыбыт дьыалаларын толору баһылаан, сайдан, кэҥээн иһэллэригэр баҕарабыт.

Хаартыска "Улусмедиа" саайтыттан