Уопсастыба

СӨ Судаарыстыбаннай Мунньаҕын (Ил Түмэн) судаарыстыбаннай тутууга уонна сокуоннаска сис кэмитиэтигэр дьон сынньалаҥнарын тутуһуу быраабылаларын туспа эрэгийиэннээҕи сокуоҥҥа киллэрэр туһунан кэпсэттилэр. Мунньаҕы Ил Түмэн Бэрэссэдээтэлин солбуйааччы – судаарыстыбаннай тутууга уонна сокуоннаска сис кэмитиэтин бэрэссэдээтэлэ Афанасий Владимиров салайан ыытта.

СӨ Борокуруорун ыстаарсай көмөлөһөөччүтэ Юлия Диодорова 414-7 №-дээх «Саха Өрөспүүбүлүкэтигэр (Якутия) кыраасданнар сынньалаҥнарын хааччыйыы туһунан» сокуон барылын туһунан иһитиннэрдэ. Кини бэлиэтээбитинэн, билигин чуумпуну кэһии иһин эппиэтинэһэ Саха Өрөспүүбүлүкэтин Административнай буруйу оҥоруу кодексыгар көрүллэр, ол эрээри, кыраасданнар сынньалаҥнарын кэһэр дьайыылар испииһэктэрэ, тыаһыыр бобуллар кэмнэрэ, ону тэҥэ көмүскэнэр сирдэр-уоттар сокуон барылыгар буолбакка, кодекс ыстатыйатын быһаарыытыгар эрэ бааллар.
Борокуратуура чуумпуну тутуһуу сокуонун сүрүн усулуобуйаларын – сүрүн тиэрминнэри уонна өйдөбүллэри, көмүскэнэр сирдэр уонна эбийиэктэр испииһэктэрин, тыаһыыр бобуллар чопчу кэмнэрин, көҥүллэнэр усулуобуйалары уонна чэпчэтиилэри туспа сокуон барылыгар олохтуурга бэлэмнээбит.
Норуот дьокутааттара Николай Кульбертинов, Алексей Корнилов, Алквиад Тарасов дакылаатчыкка чуолкайдыыр ыйытыылары биэрдилэр. Кэмитиэт чилиэннэрэ тустаах сокуон барылын кэлэр пленарнай мунньахха бастакы ааҕыыга көрөргө эрэкэмэндээссийэлээтилэр.

Ил Түмэн пресс-сулууспатын матырыйаалынан сурулунна.

Хаартыскаҕа Василий Кононов түһэриитэ .