Сергей Местников мунньаҕы саҕалыырыгар төрүт тыллары харааннааһын, сайыннарыы дойду судаарыстыбаннай бэлиитикэтин биир сүрүн хайысхата буоларын бэлиэтээтэ. Бэрэсидьиэн Владимир Путин быйыл бэс ыйын 2 күнүгэр ыытыллыбыт Нуучча тылын уонна Арассыыйа норуоттарын тылларын өйөөһүн эйгэтигэр судаарыстыба бэлиитикэтин олоххо киллэрии Сэбиэтин мунньаҕар тустаах дьаһаллары федеральнай уонна эрэгийиэннээҕи таһымнарынан өйүүр, ол эбэтэр үбүлүүр соруктары туруорбутун, быйыл аан бастаан Арассыыйа норуоттарын тылларын күнэ ыытыллыбытын санатта.
Ил Дархан Айсен Николаев өйөбүлүнэн, өрөспүүбүлүкэҕэ төрүт тыллары харааннааһын уонна сайыннарыы үлэтэ былааннаахтык тэриллэр, тустаах судаарыстыбаннай бырагыраама баар, төрүт тылларга интернет-контент тэриллэр, оҕолорго аналлаах телеханаал үлэлиир. Бырабыыталыстыба иһинэн үлэриир Тиэрмин хамыыһыйата араас хайысхаларынан тутуллар тиэрмин тыллары сайыннарыыга, сааһылыырга дьарыктанар.
Мунньах бастакы боппуруоһа Тылы сайыннарыы сүбэтин саҥардыыга туһуланна. Айсен Николаев 2026 с. бэс ыйыгар таһаарбыт ыйааҕынан Сэбиэт туһунан балаһыанньаҕа уонна састаапка уларыйыы киирбитэ. Тыл бэлиитикэтигэр норуот хаһаайыстыбатын араас хайысхаларынан дьарыктанар 11 хамыыһыйа тэриллибитэ.
– Сүрүн үлэ быһаччы бу хамыыһыйаларынан ыытыллыаҕа. Чуолаан кинилэр тустаах салааларынан тылы туттуу боппуруостарынан дьарыктаныахтара, быраабыла, сүбэ, инструкция оҥоруохтара, -- диэтэ Сергей Местников.
Хамыыһыйалар үлэлэрин түмүгэ бастаан Сүбэҕэ көрүллүөҕэ, ол киллэриллэр этии төһө олохтооҕун, туох боппуруостарга болҕомтону уурар наадатын быһаарарга итиэннэ онон сирдэтэн, саҥа соруктары туруорарга тирэх буолуоҕа. Мунньах кыттыылаахтара хамыыһыйалар бэрэссэдээтэллэригэр кандидатуралары дьүүллэстилэр.
Иккис боппуруоһунан Арассыыйа Федерациятын Тылга судаарыстыбаннай бэлиитикэтин төрүттэрин олоххо киллэриигэ 2026-2030 сс. өрөспүүбүлүкэтээҕи былаан барыла көрүлүннэ.
Санаа атастаһыытыгар мунньах кыттыылаахтара былаас уорганнарын, учуонайдары уонна уопсастыбаннай тэрилтэлэри кытары ыкса, бииргэ үлэлиир наадатын бэлиэтээтилэр диэн Ил Дархан уонна Бырабыыталыстыба пресс-сулууспата иһитиннэрэр.
Хаартыска: Саргын Скрябин.
-
1
-
0
-
0
-
0
-
0
-
0
