Тэрийээччилэр биллэрэллэринэн, үрдүк таһымнаах улахан түһүлгэ успуорт баараҕай уораҕайыгар хас эмэ тыһыынчанан тустууну сөбүлээччилэри түмүөҕэ. Манна икки күн устата аан дойду ааттаах тустууктара, буулаҕа бөҕөстөрө Туймаада көбүөрүгэр бэйэлэрин маастарыстыбаларын, үрдүкү кылаастарын көрдөрүөхтэрэ.
Сытыы киирсиилэри, күлүмнэс бырахсыылары, чаҕылхай кыайыылары көрүөн баҕалаахтарга киирии билиэт сыаната быһыллан атыыга таҕыста. Ол курдук, бастакы күн, сэтинньи 20 күнүгэр -1000 солк, иккис күн (финаллар)- сэтинньи 21 күнүгэр -1500 солк. Икки күҥҥэ абонемент сыаната -2000 солк. 16 диэри саастаахтарга уонна Анал байыаннай дьыйыы кыттыылаахтарыгар уонна кинилэр дьиэ кэргэттэрин чилиэннэригэр киирии босхо. Үгэс курдук, көрөөччүлэр ортолоругар бириис оонньонуоҕа. Билиэттэри https://sitim.info/korkin саайтка киирэн атыылаһыаххытын сөп.
ххх
«Тайм-Аут» биэриигэ СӨ Успуортка бэлэмнэниигэ киинин дириэктэрэ Михаил Пахомов билиһиннэрбитинэн, Куоркун турнирыгар Азербайджан, Афганистан, Беларусь, Корея, Казахстан, Кыргызстан, Монголия, Иран, Япония, Австралия, Македония…хамаандалара кыттыахтара. Холобур, Япония хамаандата биэс кыттааччылаах кэлэрэ билиннэ. Састаапка аан дойду былырыыҥҥы 74 киилэҕэ чөмпүйүөнэ Кота Такахаши (хаартыскаҕа) баара этилиннэ.
Итини тэҥэ Арассыыйа эрэгийиэннэриттан: Бүрээтийэттэн, Красноярскайтан, Иркутскайтан, Тываттан, Хотугу Осетияттан, Кабардино-Балкарияттан о.д.а. бөҕөстөр кэлиэхтэрэ. Кинилэр састааптарыгар Арассыыйа чөмпүйэнээттэрин призёрдара Алик Хадарцев, Азнаур Таваев, ини-бии Анзор уонна Азамат Закуевтар, Евгений Жербаев, олимпиада призёра Артур Найфонов… курдук биллиилээх бөҕөстөр бааллар. Саха Сирин көҥүл тустууга сүүмэрдэммит хамаандатын сүрүн тириэньэрэ Вадим Семенов эппитинэн, биһигиттэн сүүсчэкэ бөҕөс кыттыаҕа. Бүгүҥҥү күҥҥэ күүстээх бөҕөстөрбүт бары көбүөргэ тахсаллара күүтүллэр. Ол курдук, Лев Павлов, Александр Авелов, Константин Капрынов, Никита Софронов, Никита Хабаров бары бааллар. Санатан эттэххэ, былырыын биһиги бөҕөстөрбүтүттэн Лев Павлов, Виктор Рассадин, Олег Фомин, Ньургун Сергин, Никита Софронов бастакы, Владислав Кривошапкин, Константин Капрынов, Евгений Аронов, Никита Хабаров иккис, Егор Явловскай, Александр Авелов үһүс миэстэлэри ылбыттара. Быйыл даҕаны бэйэбит дьоммутугар эрэнэбит! Биэрии кэмигэр кыайыылаахтар бириистэрэ эмиэ ахтылынна. Хас ыйааһын ахсын бастаабыттар 300-түү, иккистээбиттэр 200-түү, үһүс буолбуттар 100-түү тыһ. солк. харчынан наҕараадаланыахтара. Оттон кыайыылааҕы бэлэмнээбит тренер 100 тыһ. солк. харчынан бэлиэтэниэҕэ. Ону тэҥэ спонсордар олохтообут бириистэрэ туттарыллыахтара диэн буолла. Холобур, «Якутия» авиа-хампаанньа бэйэтин анал бирииһин олохтоото. Түһүлгэ бочуоттаах ыалдьытынан – көҥүл тустууга Россия сүүмэрдэммит хамаандатын сүрүн тренерэ Хаджимурад Гацалов буолуоҕа. Онон дьэ барыгытын сэтинньи 20-21 күннэригэр «Өрөгөй» Күрэс киинигэр улуу тренер Д.П. Коркин түһүлгэтигэр ыҥырабыт диэн https://dzulurgan.ru саайтка Петр Павлов суруйар.
Алексей МАТВЕЕВ
Хаартыскалар https://dzulurgan.ru
-
0
-
0
-
0
-
0
-
0
-
0
