«Биир ньыгыл Арассыыйа» фракция салайааччытын бастакы солбуйааччы Андрей Исаев дьиэ кэргэни өйүүр сыалтан бу миэрэни киллэрбиттэрин бэлиэтээбит.
«Бу иннинэ «больничнай» төлөбүр маннык быраабыланан бэриллэрэ: 5 сыл ыстаастаах хамнаһын 60%-нын ылара, 5-7 сыл ыстаастаах – 80%-нын уонна 8 сылтан 25 сылга диэри ыстаастаахтар 100%-нын. Ол иһин эдэр төрөппүт оҕото ыалдьыбытынан үлэлээбэтэҕинэ, ыйдааҕы дохуота биллэрдик кыччыыра», -- диэн кини быһаарбыт.
Ол иһин «Биир ньыгыл Арассыыйа» дьокутааттара эдэр төрөппүттэргэ оҕолорун ыалдьыбытынан үлэлээбэтэх кэмнэригэр хамнастарын 100% төлүүрү мэктиэлиир сокуон барылын Госдумаҕа оҥорон киллэрбиттэр.
Эрэгийиэннэртэн эдэр төрөппүттэр «Ийэлэр сэбиэттэрэ» уопсастыбаннай тэрилтэҕэ бу боппуруоһунан тахса сылдьыбыттарын туһунан Арассыыйатааҕы норуот фронун бэрэссэдээтэлэ Татьяна Буцкая кэпсээбит. «“Больничнай” төлөбүрдэрин ылан баран, төрөппүттэр олус сонньуйалларын туһунан миигин кытары көрсүһүүгэ кэпсээбиттэрэ. Тоҕо маннык систиэмэ олохтоммутун ыйыталлара. Кырдьык, хомойоллоругар төрүөт баар, кинилэргэ аптекаҕа эми 60% чэпчэтэн атыылабаттара чуолкай», -- диэн кини бэлиэтээбит. Ол иһин Ийэлэр сэбиэттэрэ «Биир ньыгыл Арассыыйа» фракция дьокутааттарыгар тахсан, бу кыһалҕаны туоратар сокуон барылын оҥороллоругар этии киллэрбит. «Докумуон оҥоһуллан, кылгас кэм иһигэр ылыллынна», -- диэн Татьяна Буцкая түмүгэр эппит.
«Оҕо ыарытыйбыт кэмигэр ийэтэ аттыгар баар, көрөр-истэр буоллаҕына, түргэнник үтүөрэр, санаата көтөҕүллэр. «Биир ньыгыл Арассыыйа» бу сокуону олоххо киллэрбитэ биһиги дойдубутугар оҕо аймах уонна дьиэ кэргэн өйөбүллээх буоларын туоһулуур», -- диэн Ил Түмэн наукаҕа, үөрэххэ, култуураҕа, сонуну киэҥник тарҕатар ситимнэргэ уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Феодосия Габышева бэлиэтээбит.
Санатар буоллахха, РФ Бэрэсидьиэнэ Владимир Путин Федеральнай мунньахха Анал этиитигэр оҕолоох дьиэ кэргэни өйүүр миэрэлэри олоххо киллэрэр туһунан бэлиэтээбитэ.
-
0
-
0
-
0
-
0
-
0
-
0
