-Ил Дархан Айсен Николаев өрөспүүбүлүкэбит социальнай-экэнэмиичэскэй бигэ туругар туһуламмыт мунньаҕар норуот дьокутааттарыгар, бырабыыталыстыба чилиэннэригэр туһаайыы оҥордо.
Кырдьык, билигин дойду үрдүнэн ыарахан кэм. Биһиги “глобальнай вызов” күннэригэр олоробут. Онон Ил Дархан этиитэ бириэмэтигэр олус тоҕоостоохтук этилинннэ.
Хас биирдии салааҕа корректировка барыа. Онон сиэттэрэн, бүддьүөккэ уларыйыылар киириэхтэрэ. Маныаха өрөспүүбүлүкэ Баһылыга нэһилиэнньэ уйаҥ араҥатыгар болҕомтотун уурда. Ол курдук, биһиги кэмитиэппит үлэтэ суох хаалбыт төрөппүттэри өйүүргэ үп-харчы угалларын туруорсуо. Маны тэҥэ социальнай хантараак, саҥа дьыала тэрийэр урбаанньыттарга көмө харчы суумалара улаатыа.
Элбэх оҕолоох дьиэ кэргэннэргэ өйөбүл биир көрүҥүн быһыытынан өрөспүүбүлүкэттэн бэриллэр Ийэ хапытаалыттан уу харчынан устууну киллэриэхпит. Бу биир кэмнээх өйөбүл. Билиҥҥи туругунан итинник быраап сокуонунан суох этэ. Олорор усулуобуйаларын тупсарыыга, оҕону үөрэхтээһиҥҥэ, доруобуйатын көрдөрүүгэ, о.д.а. туһаналлара. Мин санаабар, билиҥҥи ыарахан экэнэмиичэскэй балаһыанньаҕа маннык дьаһаныы элбэх оҕолоох дьиэ кэргэҥҥэ көмө буолуо этэ.
Маны тэҥэ Айсен Сергеевич урбаанньыттарга этии киллэрдэ. Экэниэмикэ бигэтийиитигэр бырабыыталыстыба өттүттэн сүҥкэн үлэ ыытыллыа. Эминэн хааччыллыы боппуруоһа эмиэ уһулуччу суолталанна.
Ил Дархаммыт эрэннэрбитинэн, өрөспүүбүлүкэҕэ билиҥҥи туругунан үс ыйга холкутук тиийэр ас, эмп саппааһа баар.
Кини өрөспүүбүлүкэбит чугастааҕы кэскилэ хас биирдиибититтэн тутулуктааҕын тоһоҕолоон эттэ. Кырдьык, биир сомоҕо буолан, төрөөбүт Сахабыт Сирин туһугар туох баар күүһү түмэн үлэлиир-хамсыыр кэммит кэллэ.
-
0
-
0
-
0
-
0
-
0
-
0
