Санаттахха, ахсынньы 26 күнүгэр РФ Биэнсийэҕэ уонна социальнай страховкалааһыҥҥа пуондатын бирикээһинэн Социальнай пуонда Саха Сиринээҕи салаатын управляющайынан Марина Германы анаабыта. Марина Евгеньевна үлэтин тохсунньу 1 күнүттэн саҕалыыр. Бу иннинэ Марина Герман РФ Социальнай страховкалааһын пуондатын Саха Сиринээҕи салаатын эрэгийиэннээҕи управляющайынан үлэлээбитэ.
Бу уларыйыылар үгүс киһини долгуталлар, онтон сиэттэрэн араас ыйытыктар үөскүүллэр. Дьон-сэргэ мунаарар ыйытыыларыгар Үөһээ Бүлүү улууһун пенсионнай пуонда тэрилтэтин салайааччыта Альбина Николаева маннык хоруйдары биэрдэ.
- Клиентскай сулууспаҕа баран ИЛС выпискатын ылар наада дуо?
- Эһиги үлэҕит ыстааһын туһунан сибидиэнньэлэр индивидуальнай счекка кичэллээхтик харалла сыталлар. Бу икки тэрилтэ холбоһоллоругар дааннайдаргыт ханна да сүппэттэр. Выписканы госуслуга порталын нөҥүө тус кабинеккытыгар киирэн сакаастыаххытын сөп. Бу выписканы ылыы булгуччулаах буолбатах.
- Биэнсийэлээх диэн хордуоҥка дастабырыанньа билигин туһата суох, булгуччу пластиковайы ылыахтааххын дииллэр, ол кырдьык дуо?
- Урукку кумааҕы дастабырыанньа оннунан хаалар, ону ханна баҕарар туһаныахха сөп. Саҥа пенсияҕа тахсар дьоҥҥо пластиковай дастабырыанньа оҥоһуллар. Онтон ким уларыттарыан баҕалаах пенсионнай тэрилтэ клиентскай саалатыгар кэлэн пластиковайга көһөттөрүөн сөп.
- Икки фонда холбостохторуна пенсиябыт түһэр күнэ-дьыла уларыйыа дуо?
- Суох, пенсия урут түһэ турбут кэмигэр түһүөҕэ.
- Бу тэрилтэлэр оҥорор өҥөлөрө уруккутунан хаалыа дуо?
- Пенсионнай фонда уонна социальнай страховкалааһын фондалара баччаҕа диэри оҥорон кэлбит өҥөлөрүн, үлэлэрин толору оҥоруохтара. Төттөрүтүн, бу өҥөлөрүнэн туһаныы түргэтиэҕэ уонна судургу буолуоҕа. Араас тэрилтэлэринэн сүүрүү суох буолуоҕа уонна тэрилтэлэр икки ардыларыгар запрос көрдөөһүнүгэр бириэмэ барбат буолан, араас төлөбүрдэр түһүүлэрэ түргэтээн биэриэҕэ.
- Үлэ ыстааһын туһунан сибидиэнньэлэр, СНИЛС уонна да атын дааннайдар ханна хараллар буолуохтарай?
- Бу дааннайдар барылара цифровой формакка көһөрүллэн, эрэллээхтик хараллаллар. Икки тэрилтэ холбоһуутугар информационнай ситимҥэ туох да уларыйыы киирбэт. Кумааҕы архив уруккутунан баарын курдук баар.
- Гражданнары тус приемнааһын ханна баар буоларый?
- Социальнай фонда клиеннары кытта үлэҕэ офиһыгар (билигин үлэлии олорор пенсионнай тэрилтэ хонтуоратыгар) уонна «Мин докумуоннарым» (МФЦ) тэрилтэтигэр олохтоохтору приемнуохтара. Социальнай өйөбүл федеральнай миэрэлэрин «биир түннүк» режимыгар уонна «Госуслуги» портал нөҥүө түргэнник оҥотторуохха сөп.
- Альбина Ивановна, эппиэттэриҥ иһин махтанабын!
Кэпсэттэ Галина Васильева
-
0
-
0
-
0
-
0
-
0
-
0
