Фекла Михайловна Кычкина «Республиканский комплексный центр социального обслуживания населения» диэн тэрилтэҕэ үлэлиир. Кини доруобуйаларынан хааччахтаах, көрөр киһитэ суох соҕотох дьону бүөбэйдиир . Бу – уустук үлэ. Мээнэ киһи ылбычча санаммат идэтэ. Киһиттэн аһыныгас санааны, үтүө майгыны, болҕомтолоох буолууну, тулууру, самныбат күүстээх санааны эрэйэр. Фекла Михайловнаҕа ити хаачыстыбалар барыта бааллар. Ол иһин да кини өрөспүүбүлүкэтээҕи уонна куораттааҕы «Бастыҥ социальнай үлэһит» диэн күөн күрэскэ кыайдаҕа эбээт. “СӨ социальнай сулууспатын туйгуна”, “Үлэ бэтэрээнэ” бэлиэлэринэн наҕараадаламмыта.
Фекла Михайловна -- «Профессиональное мастерство социального работника» диэн бырагыраама, харахтарынан I группалаах инбэлииттэри эпиэкэҕэ ыларга докумуону хайдах толорорго үөрэтэр методическай босуобуйа ааптара. Кини уопутун РФ социальнай быраактыкаларын энциклопедиятыгар киллэрбиттэрэ. Эдэр кэллиэгэлэригэр «Школа молодого социального работника» диэн дьарыктары ыытар. Көрөр-харайар дьонун кыһалҕаларын чэпчэтэ сатаан, истиэнэнэн сирдэтинэн, кыйа хаамалларыгар анаан эркиҥҥэ тутулук, оронтон тардыстан туралларыгар тутаахтаах быа, ваннайтан тахсалларыгар хомуллар систээх ыскамыайканы толкуйдаабыта.
«Эһиил Арассыыйа социальнай харалтата тэриллибитэ 30 сылын туолар. Биһиги кииммит кыаммат, кыаллыбат, ким да көрөр киһитэ суох сытар дьоҥҥо көмөлөһөр, кинилэри көрөбүт-харайабыт. Ол курдук, сууйабыт, дьиэлэрин хомуйабыт, астарын таһабыт, эмтэрин аҕалабыт, докумуоннарын толорууга сүүрэбит. Владимир Путин «Долговременный уход» диэн бырагыраамата 17 эрэгийиэҥҥэ үлэлээн эрэр. 2022 сылтан Саха сиригэр киириэхтээх. Оччоҕо биһигини кытта эмчиттэр ыкса бииргэ үлэлэһэр буолуохтара. Ити саҥа саҕалааһыҥҥа бэлэмнэнэн, бу сылтан ыла күҥҥэ үстүү киһини көрөбүт. Тутуһар сүрүн тосхолбут – бүөбэйдиир дьоммутугар чиэһинэйдик, харыстабыллаахтык, болҕомтолоохтук сыһыаннаһыы. Көрөр-харайар дьонум бэйэлэрин соҕотох курдук сананыахтарын баҕарбаппын, ол иһин өрүү аттыларыгар баар буоларга, истиҥник кэпсэтэргэ, көрдөһүүлэрин түргэнник толорорго, доҕор-атас буоларга кыһаллабыт”, -- диир Фекла Михайловна.
Идэтигэр итинник бэриниилээх киһиэхэ куоластыыр сыылкаҕыт бу баар: http://golos.ysia.ru/contest-photo/740/
Үлэһит киһи чиэстэниэхтээх, сырата кэмигэр сыаналаныахтаах.
- 0
- 0
- 0
- 0
- 0
- 0