Саха Өрөспүүбүлүкэтин Ил Түмэнэ суут уонна сокуон иннигэр бары тэҥ буолууларын мэктиэлиир быраап төрдө, үрдүкү сокуон – Россия Федерациятын Конституцията ылыныллыбыт сылыгар тэриллибитин бэлиэтиир тоҕоостоох. Конституцияҕа олоҕуран, биһиги араас киэҥ хабааннаах уларыйыылары, уларытыылары аастыбыт, уопсастыбабытын сомоҕолоотубут уонна судаарыстыбаннаспытын бөҕөргөттүбүт. Ил Түмэн алта ыҥырыытын бары дьокутааттарын таһаарыылаах үлэтин түмүгэ Россия аныгы парламентаризмын быстыспат сорҕото буоларын киэн тутта бэлиэтиибит.
Саха сирин парламена норуот интэриэһин туруорсар, көмүскүүр уорган быһыытынан эрэгийиэннээҕи бэлиитикэ эйгэтин биир киинэ буолар, онуоха бар дьон дьокутааттара өрөспүүбүлүкэҕэ ыытыллар судаарыстыба бэлиитикэтин уонна уопсастыбаннай-бэлитиичэскэй олох быһаччы кыттыылаахтара. Парламент үлэтин иитинэн ыытыллар парламент истиилэригэр, аһаҕас истиилэригэр, төгүрүк остуолларга бар дьон дьокутааттара өрөспүүбүлүкэ олоҕор тирээн турар боппуруостары дьону-сэргэни кытта бииргэ көрөллөр, ырыталлар.
Ил Түмэн 30 сыллаах үлэтигэр 3 тыһыынчаттан тахса Саха Өрөспүүбүлүкэтин сокуона уонна 10 тыһыынча уураах ылынылынна, 161 парламент истиитэ уонна аһаҕас истии, 333 бырабыыталыстыба чааһа, 388 төгүрүк остуол ыытылынна.
Саха Өрөспүүбүлүкэтин Ил Түмэнэ уопсастыбаннай суолталаах тэрээһиннэри көҕүлээн ыытар, сүрүннүүр, саха омук уонна Хоту дойду аҕыйах ахсааннаах норуоттарын үгэс буолбут төрүт дьарыктарын харыстааһыҥҥа, тылларын, култуураларын уонна ускуустубаларын сайыннарыыга тиһиктээхтик үлэлиир.
Россия Федерациятын Федеральнай Мунньаҕар Саха Өрөспүүбүлүкэтин күннэрин ыытыы үтүө үгэс буолла. 2022 сыл ахсынньы сүүрбэ үс күнүгэр Федерация Сэбиэтэ өрөспүүбүлүкэбит сайдыытыгар тыын суолталаах боппуруостары быһаарыыга туһаайыллар Саха Өрөспүүбүлүкэтин социальнай-экэнэмиичэскэй сайдыытын судаарыстыба өттүттэн өйүүр туһунан уураах ылыммыта. Ол уураахха федеральнай сокуоннар балаһыанньаларыгар көннөрүүлэри киллэрии, итиэннэ олох-дьаһах, тырааныспар уонна энэргиэтикэ ис тутулун эбийиэктэрин тутуу көрүллэр.
Саха сирин парламена 30 сыллааҕы үлэтигэр Россия Федерациятын 30 субъегын судаарыстыбаннай былааһын сокуону оҥорор уорганнарын кытта бииргэ үлэлээһин туһунан сөбүлэһиилэри уонна дуогабардары түһэрсибитэ.
Билиҥҥи уустук кэмҥэ дьон-сэргэ иллээх-эйэлээх олоҕун, бэлиитикэ бигэ туругун харыстааһын уонна норуоттары сомоҕолооһун Россия Федерациятын Президенэ В.В. Путин биһиги модун кыахтаах дойдубут – Россия Федерацията сайдарын туһугар туруорбут сыалын-соругун ситиһэргэ олук буолаллар.
Саха Өрөспүүбүлүкэтин Ил Түмэнэ Саха Өрөспүүбүлүкэтин Ил Дарханын А.С. Николаевы уонна өрөспүүбүлүкэ Бырабыыталыстыбатын кытта ыкса алтыһан ыллыктаахтык үлэлээбитэ уонна инникитин даҕаны үлэлиэҕэ. Саха сирэ сайдарын, дьон-сэргэ олоҕо тупсарын туһугар былаас бары салаалара бииргэ үлэлиирбит үтүө түмүктээх буолуоҕа.
Саха АССР Үрдүкү Сэбиэтин уонна Саха Өрөспүүбүлүкэтин Ил Түмэнин бары ыҥырыыларын бар дьонун дьокутааттарыгар барҕа махталбытын биллэрэбит. Эһиги Саха Өрөспүүбүлүкэтин уопсастыбаннай-бэлитиичэскэй, социальнай уонна култуурунай-духуобунай сайдыытыгар дьоһун кылааккытын киллэрдигит.
Ытыктабыллаах Саха сирин олохтоохторо! Саха Өрөспүүбүлүкэтин Ил Түмэнэ тэриллибитэ 30 сылынан эҕэрдэлээн туран, эһиэхэ Россия Федерациятын уонна төрөөбүт өрөспүүбүлүкэбит сайдарын туһугар таһаарыылаах, айымньылаах үлэни, үрдүк ситиһиилэри, чэгиэн доруобуйаны баҕарабын!
Алексей Еремеев, Саха Өрөспүүбүлүкэтин Ил Түмэнин Бэрэссэдээтэлэ
-
0
-
0
-
0
-
0
-
0
-
0
