-Саха Сирин ытык-мааны олохтоохторо! Бука барыгытын салаллан кэлбит саргылаах Саҥа дьылынан, үүммүт 2025 сылынан итиитик-истиҥник эҕэрдэлиибин!
Номнуо биир сыл ааһан, сылбыт түмүктэрин ырытан көрөр, кэлэр сылга сыал-сорук туруорунар кэммит кэллэ. Ааспыт 2024 сыл хас биирдиибитигэр үгүс умнуллубат түгэни бэлэхтээтэ, саҥа аартыктары арыйда. Барыта эриэ-дэхси буолбатаҕын үрдүнэн, үгүс үлэ ыытылынна, туруоруллубут сыал-сорук ситтэ.
Ил Дархан Айсен Сергеевич Николаев Судаарыстыбаннай Мунньаҕар Туһаайыы этиитигэр, үүммүт 2025 сылы «Ийэ дойдуну көмүскээччи» сылынан биллэрдэ. Ити чэрчитинэн, өрөспүүбүлүкэ үрдүнэн бу хайысхаҕа үгүс үлэ ыытыллыаҕа. Улуу Кыайыы 80 сылын өрө күүрүүлээхтик бэлиэтиэхпит. Көлүөнэлэр тулхадыйбат сибээстэрин олохсутууга, дойдуга бэриниилээх буолуу тыынын күүһүрдүүгэ болҕомто ууруллуоҕа. Үөрэх эйгэтигэр дойдумсах оҕону иитэн таһаарыы соруга туруоҕа. Бу соруктар хас биирдиибит санаабытын ууран, биир сомоҕо буолан үлэлээтэхпитинэ, хайаан да олоххо киириэхтэрэ.
Күндү Сахам Сирин олохтоохторун өссө төгүл күүтүүлээх, баҕа санааларбыт туолар аптаах кэмнэрэ кэлбиттэринэн эҕэрдэлиибин! Үүнэр саҥа сылга баҕа санааларгыт туоллуннар, санаабыккыт сатанан, ылсыбыккыт ыпсан истин! Баҕарабын дьолу-соргуну, кытаанах доруобуйаны. Дьиэ кэргэҥҥитигэр ил-эйэ олохсуйдун, таптал уйаланнын! Саҥа дьылынан!
Хаартыска дьокутаат архыыбыттан
-
3
-
0
-
0
-
0
-
0
-
0
