Норуот дьокутаата Андрей Находкин, итиэннэ Госдума дьокутаата Галина Данчикова уонна Дьокуускай баһылыга Евгений Григорьев буолан үһүөн олунньу 14 күнүгэр “Кыылларга эппиэтинэстээх сыһыан туһунан” сокуону тупсаран-көннөрөн оҥорор оробуочай бөлөх мунньаҕар онлайн киэбинэн кыттыыны ыллылар.
--Биһиги туруорсууларбытын учуоттаабыттар. Сокуоҥҥа субъектар боломуочуйаларын кэҥэтэн биэриигэ туһуламмыт этиилэрбитин сүрүн уларытыы быһыытынан киллэрбиттэр. Ол курдук, эрэгийиэннэр бэйдиэ ыттарын хайдах дьаһайалларын бэйэлэрэ быһаарыахтаахтар. Олорор усулуобуйаларыттан уонна балаһыанньаларыттан көрөн, табыгастаах быраабылалары олохтуохтаахтар, -- диэн чопчулаата Андрей Михайлович.
Бу сокуон барылыгар этиллэринэн, приюкка хаайыллыбыт ыт саҥа хаһаайына көстүөр диэри онно туруохтаах. Иччитэ суох хас дьэллик ыт баарын субъект бэйэтэ суоттаан-учуоттаан ааҕыахтаах, мониторины ыытыахтаах. Доруобуйа харыстабылын, үөрэх, оҕо тэрилтэлэрэ хапсар, ону таһынан эрэгийиэн бэйэтэ бэлиэтээбит территорияларыгар ыттары босхо ыытар көҥүллэммэт буолар.
--Биһиги Госдумаҕа баар дьокутааттарбыт нөҥүө өссө да бу сокуоҥҥа кэккэ уларытыылары киллэрэри туруулаһыахпыт. Холобура, ахсааннарын хонтуруоллааһын, приюту тутуу үбүн-харчытын, булгуччулаах регистрация боппуруостарын, -- диэн Андрей Находкин манан сөп буолан хаалбакка, дьыаланы тиһэҕэр диэри тиэрдэр санаалааҕын биллэрдэ.
Галина Данчикова приюту тутууга аҥаарын федеральнай бүддьүөт уйунарыгар, ыттар төһө кырыктаах буолбуттарын, дьоҥҥо кутталламмыттарын быһаарар киритиэрий олохтонуохтааҕын, онуоха эрэгийиэн килиимэтин уратытын учуоттуохтаахтарын уонна дьэллик ыттары ааҕыы методикатын киллэриэхтээхтэрин туһунан эттэ.
-
0
-
0
-
0
-
0
-
0
-
0
