Национальнай бибилэтиэкэ дириэктэрэ Саргылана Максимова этэринэн, Анастасия Алексеевна кэллэктиипкэ улахан аптарытыаттаах, идэтигэр ураты бэриниилээх, үлэҕэ эппиэтинэстээх сыһыанынан барыларыгар холобур буолар, эдэр үлэһиттэргэ бу сыллар усталарыгар ытыктанар настаабынньык. Национальнай бибилэтиэкэ пуондатыгар 1 мөл. 900 тыһ. тахса араас докумуон харайыллар, ол иһигэр сэдэх суруйуулар, кинигэ пааматынньыктара. Бу барыта - биһиги норуоппут култууратын уонна духуобунаһын нэһилиэстибэтэ. Анастасия Алексеевна сыралаах үлэтинэн, пуонда сылын ахсын сэдэх докумуоннарынан, кэллиэксийэлэринэн хаҥатыллар. Онтон урукку сылларга киирбит докумуоннар күннэтэ көрүүгэ-истиигэ, сөптөөх усулуобуйаҕа харайыллаллар.
Кини салайыытынан бибилэтиэкэҕэ дойду үрдүнэн ханна даҕаны суох “Докумуон электроннай уобараһа” бырайыак үлэлиир. Бу бырайыагынан докумуон төһө да ыраах буоллар, библиографическай суруйуута, электроннай уобараһа оҥоһуллар.
“Саха Сирин хаһыаттарыгар саҥа олоҕу бэлэхтээ” бырагыраама таһаарыылаахтык үлэлиир. Бырагыраама чэрчитинэн 2019-2023 сылларга тахсыбыт хаһыаттар сыыппараҕа киирдилэр. Уопсайа 49 тыһыынча нүөмэр! Бу өрөспүүбүлүкэ эрэ буолбакка, улуустааҕы, кыраайы үөрэтэр хаһыаттар. Ол гынан, кэлэр көлүөнэ ааҕааччыларга бу хаһыаттар сыыппара көрүҥүнэн болдьоҕо суох тийиэхтэрэ. Национальнай, муниципальнай, үөрэх уонна билим бибилэтиэкэлэрин пуондаларыгар харайыллар докумуоннар туруктарын кэтээн көрүү оҥоһуллар. Арассыыйа 26 субъегар бибилэтиэкэлэр пуондаларын анаалыстааһын ыытылынна. Манна бу сирдэргэ олохсуйан олорор 42 аҕыйах ахсааннаах норуоттар тылларынан тахсыбыт, бэчээттэммит кинигэлэр, суруйуулар, хаһыаттар киирдилэр.
Бу курдук олус элбэх салааҕа үлэ барыытын Анастасия Алексеевна иилээн ыытар. Кырдьык даҕаны кини – Үлэ киһитэ. Онон бу бириэмийэ сыралаах өр сыллар түмүгүнэн туттарылынна дии саныыбын”, -диэн Саргылана Васильевна санаатын үллэстэр.
-
1
-
0
-
1
-
0
-
0
-
0
