Уопсастыба

Норуот артыыһын бырайыага

Саха норуотун артыыһа Александр Бурнашов сахалыы ырыаны-тойугу таптааччыларга анаан «Көмүс ааттар» диэн бырайыагы 2019 сыл күһүнүттэн саҕалаабыта. Ол туһунан норуот артыыһа маннык кэпсиир:

– Норуот таптыыр артыыстарыгар уонна мелодистарыгар аналлаах «Көмүс ааттар» диэн бырайыагы Эстрада судаарыстыбаннай тыйаатыгар саҕалаабытым. Бастакы ахтыы киэһэтэ чаҕылхай сулус буолан күлүмнээн ааспыт, Саха Өрөспүүбүлүкэтин үтүөлээх артыыската, Эстрада тыйаатырын бэтэрээнэ Наталья Трапезниковаҕа анаммыта. Дьэ ол кэмтэн ыла Раиса Захарова, Ольга Иванова, Марфа Колесова, Юрий Платонов, Марина Попова, Вера Никифорова, Анастасия Варламова Ирина Елизарова, Петр Пестряков, Николай Тулааһынап, Светлана Кудрина, Аркадий Новиков, Гаврил Николаев, Иннокентий Сивцев курдук уостан түспэт ырыалары айан уонна толорон хаалларбыт уһулуччулаах артыыстары, ырыаһыттары үйэтитэр кэнсиэртэр, ахтыы киэһэлэрэ тэрилиннилэр. Бырайыак саҕаланыаҕыттан режиссерунан Саха Өрөспүүбүлүкэтин култууратын үтүөлээх үлэһитэ Амгалена Нотара үтүө суобастаахтык үлэлэһэн кэллэ.

Өрөспүүбүлүкэ олохтоохторо бырайыагы олус биһирээтилэр, биир саамай кэтэһэр кэнсиэртэрэ буолла. Ону «Көмүс ааттарга» көрөөччү сааланы толору кэлэрэ, тустаах артыыстар уонна ырыаһыттар аймахтара, төрөөбүт-үөскээбит улуустарын дьаһалталара улахан махталларын бэйэлэрин суруктарыгар этэллэрэ арылхайдык туоһулуур.

Үйэтитиигэ анаммыт тэрээһин биир киэһэлээх ахтыынан бүтэн хаалара тутах, ол иһин Александр Валерьевич ити кэнсиэртэргэ тустаах артыыстар, ырыаһыттар аймахтара бэлэхтээбит кинигэлэрин, ырыаларын диискэлэрин уо.д.а. мунньан-түмэн, бэртээхэй мусуойу тэрийдэ!

Силигин ситэрэн, ахтыы киэһэлэрин видеоҕа уһултаран, мусуойга уонна Саха араадьыйатын көмүс пуондатыгар, «Саха» иһитиннэрэр-көрдөрөр хампаанньа архыыбыгар харайар. Биир үөрүүлээҕэ баар бу ахтыы киэһэлэрин ютуб-ханаалынан хаһан баҕарар көрүөххэ сөп. Онон норуот артыыһа Александр Бурнашов сахалыы ырыаны таптааччыларга итиэннэ кэлэр көлүөнэҕэ дьоһуннаахай бэлэҕи оҥордо.

Ырыа ыһыаҕа

«Көмүс ааттар» бырайыак биир уочараттаах тэрээһинэ муус устар 12 күнүгэр А.Е. Кулаковскай-Өксөкүлээх Өлөксөй аатынан Норуоттар доҕордоһууларын дьиэтигэр буолан ааста. 1990-с сыллардаахха тыа сирин оскуолалара тус сирэйдээх буолууларыгар айымньылаахтык үлэлээбит, 2002 сыллаахха «Саха Өрөспүүбүлүкэтин бастыҥ инноватора» аатынан бэлиэтэммит, талааннаах инноватор-педагог, хомоҕой тыллаах хоһоонньут, норуокка тарҕаммыт элбэх  нарын иэйиилээх ырыалары айбыт самодеятельнай композитор, рок-ырыаһыт  Николай Сибиряков айар үлэтигэр ананна.

Александр Бурнашов уус-уран хомоҕой тылынан Николай Сибиряков олоҕун, айар үлэтин туһунан сырдатта, тус бэйэтэ кинилиин алтыһан ааспыт түгэннэрин туһунан сэһэргээн долгутта. Үгүс көрөөччү Николай Сибиряков ырыаларыттан «Оҕо сааһы», «Чараҥ вальсын», «Ньургуһуннары», «Дьикти сайыны», «Ардах музыкатын»… ордук сэҥээрэн истэрэ чахчы.

Дьэ бу кэрэ киэһэ кинилэр ити ырыалары репертуардарыгар киллэрэн, үйэ чиэппэрин устата толорон кэлбит улахан ырыаһыттары бииргэ түмэн олорон иһиттилэр.

Ол курдук, ахтыы киэһэҕэ саха норуотун артыыстара Екатерина уонна Алексей Егоровтар, Саха Өрөспүүбүлүкэтин үтүөлээх артыыстара Сахая, Анастасия Готовцева, эдэр ырыаһыт Герасим Павлов, Үөрэх үлэһиттэрин идэлэрин үрдэтэр институт дириэктэрин солбуйааччы Николай Бугаев-Буҕа Ньукулай, Чурапчыттан «Табык» уонна «Айан+» бөлөхтөр, Арассыыйа Федерациятын үөрэҕириитин бочуоттаах үлэһитэ Розалия Попова Николай Максимович айан хаалларбыт ырыаларын ыллаатылар.

Кинини кытары алтыспыт түгэннэриттэн кылгастык ахтан-санаан аастылар.

Игорь Петров хаартыскаҕа түһэриилэрэ