Өрөспүүбүлүкэ күнүнэн судаарыстыбаннай наҕараадаларынан бэлиэтэммиттэр кэккэлэригэр Алдан улууһун удьуор табаһыттара, кэргэннии Любовь, Олег Сидоровтар бааллар. Кинилэр ааспыт 2023 сыл түмүгүнэн үрдүк көрдөрүүлэри ситиһэн, Ил Дархан Айсен Николаев 2024 с. муус устар 27 күнүгэр таһаарбыт 266 №-дээх ыйааҕынан, Үлэ Дьоруойа Василий Михайлович Кладкин аатынан Судаарыстыбаннай бириэмийэ лауреаттара буоллулар!
Олег Сидоров табаҕа 1990 сылтан үлэлиир, аҕатын, эмиэ удьуор табаһыт, Арассыыйа Федерациятын тыатын хаһаайыстыбатын үтүөлээх үлэһитэ Владимир Степанович Сидоров олохтообут дьыалатын салҕаан, аймах-билэ дьонун түмэн, 2014 сыллаахтан аҕатын аатынан общинаны тэрийэн үлэлэтэ сылдьар. Күн бүгүн община барыта 1000 табалаах. Удьуор табаһыттар сыралаах үлэлэрин түмүгэр, үлэ-хамнас көрдөрүүтэ, таба ахсаана сыллата эбиллэр, таба боруодатын тупсарыыга утумнаах үлэ ыытыллар.
Олег Владимирович олоҕун доҕоро, кэргэнэ Любовь Игоревна табаҕа 1994 сылтан үлэлиир. 2013 сыллаахха Алданнааҕы политехникум экэниэмикэҕэ уонна буҕаалтыр учуотугар салаатын бүтэрэн, общинаҕа суот-учуот үлэтин толорорун таһынан, кэргэнин үлэлиир-хамсыы усулуобуйатын тэрийэн, чуумсуктуур. СГТХА технологияҕа салаатыгар идэни үрдэтэр кууруска эбии үөрэнэн, табаттан ылыллар бородууксуйаны астыыр-таҥастыыр үөрүйэҕин-сатабылын чочуйда.
Өбүгэ төрүт дьарыгын сайыннарыыга үлэлиир иллээх ыал үс оҕолоох. Оҕолорун кыра саастарыттан ыстаадаҕа илдьэ сылдьан, табаны көрөргө-истэргэ, бултуурга-алтыырга, тулалыыр эйгэҕэ уонна айылҕаҕа харыстабыллаахтык сыһыаннаһарга үөрэтэллэр-уһуйаллар.
Любовь Игоревна уонна Олег Владимирович төрөөбүт нэһилиэктэрин, улуустарын уопсастыбаннай, култуурунай олоҕор көхтөөхтк кытталлар. Эбэҥки норуота табаны иитиигэ, бултааһыҥҥа уонна булт аһын астааһыҥҥа баай үгэстэрин биир дойдулаахтарыгар, эдэр ыччаттарга тарҕаталлар.
Кинилэр общиналарын баазатыгар, Саха сирэ Хабаровскай кыраайы кытары быысаһар сиригэр, Гонамҥа, анал орто уонна үрдүк үөрэх кыһаларыгар үөрэнэр устудьуоннар практикаланаллар, элбэҕи иҥэринэллэр диэн Тыа хаһаайыстыбатын уонна ас-үөл бэлиитикэтин министиэристибэтин үгэс буолбут хотугу салааларга управлениета этэр.
-
1
-
0
-
0
-
0
-
0
-
0
