--Дойду Төрүт сокуонугар уларытыылары киллэрии кэм-кэрдии ирдэбилэ дии саныыбын. Билигин салайтаран олорор Төрүт сокуоммут 27 сыл анараа өттүгэр ылыллыбыта. Ол кэннэ олохпутугар-дьаһахпытыгар уларыйыылар киирдилэр, сайдыы киэҥ хардыынан барар. Ол иһин кэми кытта Төрүт сокуоҥҥа аныгы кэмҥэ сөп түбэспэт хааччахтар баар буолаллар. Мин бэйэм уонна тулалыыр дьонум РФ Төрүт сокуонугар киирэр уларыйыыларга социальнай боппуруоска болҕомто ууруллубутуттан үөрэбит. Доруобуйа харыстабыла, култуура, спорт эйгэлэрэ эмиэ туоратыллыбатахтар. Муниципальнай тэриллии былааһыгар сыһыаннаан эмиэ бэрт үчүгэй уларыйыылар киирбиттэр. Ол курдук олохтоох бэйэни салайыныы уоргана судаарыстыбаннай боломуочуйалааҕынан үлэтин ыытарыгар сөптөөх үп-харчы көрүллүөхтээх диэн этиллэр. Мин бэйэм муниципальнай сулууспаҕа 10 сыл үлэлээтим, онон бу көннөрүүнү олус үөрэ аахтым.
Биэнсийэни сылын аайы дойдуга ханнык да балаһыанньа турбутун иһин индексацияланыахтаах диэн уларытыы эмиэ олус үчүгэй. Оҕо аймаҕы, дьиэ кэргэни өйүүр уларытыылар эмиэ үгүстэр. Билиҥҥи докумуоҥҥа да дьиэ кэргэн судаарыстыба болҕомтотугар сылдьарын туһунан этиллэр, ол эрээри бу өйдөбүл уопсай тылынан суруллубут. Оттон РФ Төрүт сокуонугар киирэр уларытыыларыгар бу үлэни чуолкайдаан биэрбиттэрэ кэрэхсэбиллээх. Биһиги нэһилиэкпит куоластыыр учаастага эрдэттэн бэлэмнэнии үлэтин толору ыыппыта. Социальнай ситиминэн араас утары туруорар, дьон санаатын аймыыр агитациялар тарҕаналлар, үгүс өттө сымыйа иһитиннэриилэр буолаллар. Биһиги дьоммут кырдьыгы сымыйаттан арааран, сөптөөх быһаарыныыны ылынан куоластыахтара диэн эрэнэбин.
-
0
-
0
-
0
-
0
-
0
-
0
