Төрүт сокуону 1993 с. ахсынньы 12 күнүгэр норуот уопсай куоластааһынынан ылыммыттара, оттон олоххо ахсынньы 25 күнүгэр киирбитэ. Дойду Төрүт сокуона хас биирдии киһи быраабын, куттала суох көҥүл олоҕун мэктиэлиир, араас эрэгийиэннэргэ олорор бары омуктары түмэр, Арассыыйа национальнай суверенитетын көмүскүүр, атыттартан тутулуга суох иннин диэки киэҥник хардыылаан иһэрин туоһулуур.
Норуодунай дьокутаат Николай Кульбертинов оскуола оҕолорун кытта көрсүһүү кэмигэр үөрэҕин-үлэтин, успуорка уһуйуллубутун, тустуунан үлүһүйбүтүн, билигин даҕаны остуол тенниһинэн дьарыктанарын, хас чэппиэр аайы спортивнай саалаҕа сылдьарын туһунан кэпсээтэ.
«Саханефтегазсбыт» хампаанньаҕа И.М. Губкин аатынан Арассыыйатааҕы ньиэп уонна гаас университетын, Башкортостаҥҥа баар Уфатааҕы ньиэп тиэхиньиичэскэй университетын, ХИФУ-ну бүтэрбит выпускниктары үлэҕэ ылалларын эттэ.
Кини полицияҕа үлэлиир кэмигэр оскуола оҕолорун кытта өрүү көрсөрүн, «Берегиня” оҕо дьиэтигэр сылдьарын, ППС уолаттара иитиллээччилэри кытта футболга күөн көрсөллөрүн туһунан кэпсээнин салҕаата.
ХИФУ юридическай факультетын кытта ыкса сибээстэһэллэрин, мантан дьон быраабын көмүскүүр дьон үүнэн-сайдан тахсалларын бэлиэтээтэ. Кинилэр полицияҕа участковайынан, силиэдэбэтэлинэн, дознавателинэн үлэлии бараллар.
«Куоракка полиция начаалынньыгынан үлэлии олордохпуна үлэ көрдөөн күҥҥэ 5 киһи кэлэриттэн түөрдэ кыыс буолара. Онон уолаттар үрдүк үөрэҕи баһылыырга өрөйөн-чөрөйөн биэриэххитин наада. Билигин ханнык идэҕэ үөрэнэ бараргытын билэргит буолуо, араас хайысхалаах үөрэх кыһатын аана аһаҕас», — диэтэ Николай Иванович.
Кини анал байыаннай эппэрээссийэҕэ сылдьар уолаттары, кинилэр дьиэ кэргэттэрин кытта көрсөрүн, баар кыһалҕаны быһаарарга көмөлөһөрүн, Кыайыы туһугар бары күүспүтүн түмүөхтээхпитин эттэ.
Норуодунай дьокутаат эдэр сылдьан бастакы үөрэҕин Одесса куоракка баар политехническай институту бүтэрбитин, тустуук буолан, Украинаны барытын кэрийбитин кэпсээтэ. Бырааттыы норуоту соруйан утары туруорбуттарын түмүгэр итинник быһыы-майгы тахсыбытын быһаарда. Маннык уустук кэмҥэ дойдубут интэриэһин көмүскүүргэ бары сомоҕолоһуохтаахпытын бэлиэтээтэ. Аҕа дойдуну көмүскүүр 1941-1945 сс. сэриигэ снайпер Иван Кульбертинов хорсун быһыытын ахтан-санаан ылла.
Салгыы Сэбиэскэй сойуус үрэллибитин кэнниттэн саҥа Арассыыйа Төрүт сокуонун 1993 с. хайдах ылыммыттарын, 2020 с. уларытыылары киллэрбиттэрин туһунан оскуола оҕолоругар билиһиннэрдэ.
Ону таһынан, «Айыы кыһатын» оҕолоругар Ил Түмэн дьокутааттарын үлэтин, өрөспүүбүлүкэ бүддьүөтүн хайдах ылыналларын, дохуоппут улаатан иһэрин туһунан кэпсээтэ.
Николай Кульбертинов тыа сиригэр ынахтаах-сүөһүлээх дьоҥҥо биир төбөҕө көрүллэр субсидия кээмэйэ улаатан, 39 000 солк. тиийбитин эттэ. Оччотугар түөрт ынахтаах ыал 156 000 солк. ылар кыахтанар. Урут үүтү 1 лиитэрэтин 60 солк. туталлар этэ, билигин 65 солк. Тыа хаһаайыстыбатын өйүүргэ бырабыыталыстыба сыл ахсын миллиардынан үбү-харчыны көрөрүн эттэ.
Оскуоланы бүтэрэр оҕолор билигин үлэ ырыынагар наадалаах идэни баһылаатахтарына ханна баҕарар үлэ булуохтарын сөбүн этэн туран, олох киэҥ аартыгар бэйэлэрин миэстэлэрин булалларыгар баҕарда.
Ил Түмэн дьокутаата Николай Кульбертинов «Айыы кыһатын» үөрэнээччилэрин кытта көрсүһүүгэ итинник киэҥ хабааннаах боппуруостары быһааран биэрдэ, оҕолор ыйытыктарыгар хоруйдаата уонна үүнэр көлүөнэ Аҕа дойдуга бэриниилээх буоларыгар ыҥырда.
Василий Кононов хаартыскаҕа түһэриитэ
-
3
-
0
-
0
-
0
-
0
-
0
