Хоту сир аҕыйах ахсааннаах төрүт норуоттарын боппуруостарыгар уонна Арктика дьыалаларыгар Ил Түмэн сис кэмитиэтин бэрэссэдээтэлэ Елена Голомарёва Дьокуускайга 202 мкр баар 779№-дээх учаастакка куоластаатта. “Бүгүн суолталаах күн. РФ Төрүт сокуонугар киирэр уларытыыларга куоластааһын күнэ биһиги инники олохпутун үчүгэй өттүгэр уларытар кэскиллээх. Дойдубут сайдыылаах, кыахтаах буоларыгар кыһаллабыт”, -- диэн эттэ дьокутаат.
Ил Түмэн бүддьүөккэ, үпкэ, нолуок уонна сыана политикатыгар, бас билии уонна приватизация боппуруостарыгар сис кэмитиэтин бэрэссэдээтэлэ Юрий Николаев Киров уулуссатыгар Эдэр көрөөччү тыйаатырыгар баар 709№-дээх учаастакка куоластаата. “Төрүт сокуоҥҥа көннөрүү киирэрин балысханнык сайдар олохпут ирдиир. Мин тус бэйэм бу көннөрүүлэри өйөөтүм”, -- диэн эттэ.
Ил Түмэн үөрэххэ, наукаҕа, култуураҕа, көрдөрөр-иһитиннэрэр средстволарга уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Феодосия Габышева куорат киинигэр, Национальнай библиотека тэлгэһэтигэр тэриллибит 712№-дээх учаастакка кэлэн куолаһын биэрдэ.
Ил Түмэн дьиэ кэргэн уонна оҕо аймах дьыалаларыгар кэмитиэтин бэрэссэдээтэлэ Алена Атласова Дьокуускай 202 мкр баар 779№-дээх учаастагар куоластаата уонна санаатын үллэһиннэ: “Биһиги көлүөнэ Төрүт сокуон ылылларыгар Арассыыйа хайдах олохтооҕун өйдүүр. Билигин дойду туруктаахтык сайдарын туһугар Төрүт сокуоҥҥа көннөрүү киллэрэр уолдьаста. Арассыыйа бу Төрүт сокуоҥҥа социальнай судаарыстыба буолара көстөр. Мин дьоллоох дьиэ-кэргэн, оҕо аймах иһин куоластыыбын”.
Ол курдук, бэс ыйын 25 күнүгэр норуот дьокутааттар Сергей Ларионов, Мария Христофорова, Александр Смирнов куоластаатылар. Парламентарийдар куоластыыр учаастактар үчүгэй үлэлэрин бэлиэтээтилэр, эпидемиологическай-санитарнай ирдэбиллэр тутуһалларын эттилэр.
-
0
-
0
-
0
-
0
-
0
-
0
