Үлэм биир сүрүн хайысхата -- быыбардааччыларбын кытта көрсүһүү. Ол эрээри, биллэр төрүөтүнэн, быйыл аҕыйаата. Ити гынан баран, электроннай почта, Ил Түмэн приемнайын нөҥүө быыбардааччылартан суруктар киирэ тураллар. Киирбит сайабылыанньалары тута көрөн, быһааран баран, тустаах дьоҥҥо хоруйдуубут. Оттон министиэристибэлэри, муниципальнай тэриллиилэр баһылыктарын, тэрилтэлэр салайааччыларын кытта төлөпүөн, электроннай почта ситимнэринэн сибээспитин быспаппыт. Былааннаммыт дьаһаллар ыытылла тураллар. Бу хайысханан мин көмөлөһөөччүм Егор Поповтуун үлэлэстибит.
Быйылгы үлэбин былааннаан ыытарбар былырыын Ил Түмэн дьокутааттара М.Д.Гуляевтыын уонна С.И.Никитинниин үһүө буолан бэйэбит учаастактарбыт быыбардааччыларын кытта көрсүбүппүт төһүү буолла. Ол курдук, үс улууһунан 24 нэһилиэккэ сылдьан, үлэбитин-хамнаспытын билиһиннэрэн, быыбардааччыларбыт санааларын истэн, санаа атастаһан, нэһилиэктэр салайааччыларын көрсөн, инники үлэбитин торумнуурбутугар элбэҕи туһанныбыт.
Быйыл от ыйын 30 күнүттэн атырдьах ыйын 20 күнүгэр диэри Эбээн Бытантай национальнай улууһугар “Кочевник” община таба иитэр икки ыстаадатыгар сылдьан, үлэни-хамнаһы, табаһыттар олохторун-дьаһахтарын, кыһалҕаларын билсэн кэллим. Бу айаным туһунан “Саха” национальнай көрдөрөр-иһитиннэрэр хампаанньа ханаалыгар “Түгэһиирдэр аартыктарынан Пинигинниин айан” диэн түөрт биэриигэ көрдөрүлүннэ. Аны биир биэриини бэлэмнии сылдьаллар.
Уокурукпут нэһилиэктэрин дьаһалталара бэйэ-бэйэлэрин үлэлэрин билсэ уонна хардарыта көмөлөсүһэ олороллоруттан үөрэбит. Холобур, быйыл Мындаҕаайыга Норуот айымньытын дьиэтэ хаарбах туруктааҕынан, күһүҥҥүттэн хапытаалынай өрөмүөн үлэтэ саҕаламмыта. Дьокуускай куоракка олорор Мындаҕаайыттан төрүттээхтэри алтынньы ыйга түмэн, Норуот айымньытын дьиэтин өрөмүөнүгэр бары биир сүбэнэн эбии үп-харчы хомуйуохха диэн аһаҕас ыҥырыы таһаарбытым. Түмсүү кыттыылаахтара ыҥырыыны ылынаннар, көмө харчыны хомуйа охсон, анал счекка тиксэрдибит.
Аһаҕас ыҥырыыга Таатта улууһуттан Тыараһа уонна Октябрьскай нэһилиэктэрин дьаһалталара баҕа өттүлэринэн кыттыһан, көмөлөһөбүт диэн барыбытын үөртүлэр. Ол курдук, Кыйы олохтоохторо (баһылык Прокопий Турнин) көмө харчытын тиксэрэннэр, Мындаҕаайы дьонун сүргэлэрин көтөхтүлэр. Аны Чөркөөхтөн (баһылык Андрей Семенов) бу күннэргэ Мындаҕаайыга ыалдьыттыы, таарыйа үбүнэн-харчынан көмөлөһөөрү, кэлиэхтээхтэр. Онон, бу маннык сонун тэрээһини биһирээн, саҥалыы көрүүлээх баһылыктарбыт үлэлэрин-хамнастарын сырдатан, инникитин олоххо салгыы киллэрэр баҕа санаалаахпыт.
Түгэнинэн туһанан, Сахам сирин бары олохтоохторун үүнэр саҥа 2021 сылынан эҕэрдэлиибин уонна чөл доруобуйаны, таһаарыылаах үлэни-хамнаһы, тус олоххутугар дьолу-соргуну тускулуубун.
Павел Пинигин, Ил Түмэн дьокутаата, Олимпиада чөмпүйүөнэ
-
0
-
0
-
0
-
0
-
0
-
0
