Үөрүүлээх тэрээһиҥҥэ парламент аатыттан Ил Түмэн дьиэ кэргэҥҥэ уонна оҕо аймах дьыалаларыгар сис кэмитиэтин бэрэссэдээтэлэ Алена Атласова тыл эттэ:
--Саҥардыллыбыт Конституцияҕа уонна бэйэбит Төрүт сокуоммут 11.1 ыстатыйатыгар оҕо судаарыстыба бэлиитикэтин сүрүн хайысхата буоларын бигэргэттибит. Онон Ил Дархан, Бырабыыталыстыба, Ил Түмэн дьиэ кэргэни, оҕо аймаҕы өйүүргэ туһуланар үлэни өссө далааһыннаахтык, өссө тэтимнээхтик ыытарга туруннулар. Оҕо дьоллоох оҕо сааһы билиэхтээх, толору дьиэ кэргэҥҥэ улаатыахтаах, киһи быһыытынан сайдарыгар бары усулуобуйа тэриллиэхтээх. Судаарыстыба ону хааччыйар бэлиитикэни, сокуоннары, үлэни-хамнаһы, тэрээһиннэри сүрүннүөхтээх.
Ил Түмэн дьокутааттара, быыбардааччыларбыт накаастарыттан көрөн, норуокка туһалаах сокуоннары ылынарга кыһаллабыт. Ол курдук, холобура, Арассыыйа Федерациятыгар да оҥоһулла илик сокуону биһиги эрэгийиэммит бастакынан бэлэмнээн уонна бигэргэтэн, номнуо үлэлэтэ сылдьар – элбэх оҕолоох ыал статуһун туһунан. Ити сокуон олоххо киириэҕиттэн элбэх оҕолоох дьиэ кэргэммит ахсаана биллэ улаатта: 27 тыһыынчаттан тахса этилэр, билигин 31 тыһыынчантан тахса буоллулар. Элбэх оҕолоохторун туоһулуур дастабырыанньаҕа аҕа аата эмиэ суруллар буолла – бу аҕа оруолун үрдэтиигэ суолталаах бэлиэтээһин.
Элбэх оҕолоохторго бэриллибит учаастактар инфраструктураларын оҥоруу, 5-тэн элбэх оҕолоох ыаллар дьиэлэрин усулуобуйаларын тупсаралларыгар туһуламмыт бырагыраама уочаратын түргэтэтии боппуруостарын быһаарарга Ийэ сыла төһүү буолуо диэн эрэнэбин.
-
0
-
0
-
0
-
0
-
0
-
0
