Экэниэмикэ

Атыы бытаарда

Ырыынакка киирдэххэ, урукку курдук халыҥ уочарат, матырыйаал харбыалаһыы ханан да суох, уу чуумпу сатыылаабыт. Биир-икки киһи кыра бытархай малы атыылаһаллар. Сыана ыараан, оттон дьон хамнаһа ырааҕынан хаалан, өрөмүөн оҥостооччу биллэрдик аҕыйаабыт.

Улахан хамнастаах дьон ырыынактан саарбах табаары атыыласпаттар, маҕаһыынтан хаачыстыбалааҕы ылаллар. Строительнай ырыынакка өрөмүөн оҥосторго кырыымчык бүддьүөттээх дьон чэпчэки сыаналааҕы көрдөөн кэлэллэр.

Атыыһыттар киһи суоҕуттан чуҥкуйан олороллор, обуой атыылыыр сиргэ киирбиппэр, баҕар тугу эрэ атыылаһыа диэбиттии ойон туран, отуччалаах эдэр уол туохха наадыйарбын ыйыталаһар. Үлэтин туһунан кэпсииригэр көрдөспүппэр: “Кэбис, хаһаайын көҥүлэ суох тугу да эппэппин”, — диир эрээри, ону-маны ыйыталастахха, хап-сабар эппиэттээн иһэр. Уолум хата аһаҕас-элэккэй майгылаах буолан, айаҕа аһыллан, бэрт элбэҕи кэпсээтэ.

Кини тылын тамаҕыттан иһиттэххэ, байыаннай дьайыы саҕаланан, омук табаара киирэрэ хааччахтаныаҕыттан атыылаһааччы ахсаана лаппа аҕыйаабыт. Бэлиитикэ, экэниэмикэ туруга халбаххай буолан, дьон улахан аҥаара өрөмүөн оҥостортон туттунар, балаһыанньа көнөрүн күүтэр эбит.

Куоракка саамай чэпчэки сыаналаах обуой

«Атыыбыт бытаан, көрөргүт курдук дьон суох, күҥҥэ тарбахха баттанар бэрт аҕыйах киһи өҥөйөн ааһар. Ол да буоллар, куорат үрдүнэн саамай чэпчэки сыананы тутан олоробут. Халыҥ харчыны батыһан, атыттар курдук сыанабытын хас да бүк эппэтибит. Маҕаһыыҥҥа баран көрүҥ, сыана онно хас да төгүл ыарахан.

Биһиги павильоммутугар обуой 500 араас көрүҥэ баар, холобур, кумааҕы обуой 1 рулона 250-350 солк., рулон 5 кв.м. сөп буолар. Маннык обуой олохтон хаалла, былыргыны былыт сапта, онон дьон даачатыгар хам-түм атыылаһар. Сууйуллар обуой 1 рулона 600-700 солк.

Аныгы дьон дьиэтигэр флизелиновай оҥоһуулаах виниловай обуойу килиэйдиир, маннык обуой быдан бөҕө, уһун үйэлээх, бээтинэ түстэҕинэ, чэпчэкитик сууйаллар. 1 рулон 10 кв.м. тиийэр, сыаната 1600-1900 солк.

Биллэн турар, саҥа тутуллубут дьиэҕэ киирэргэ дьон обуой килиэйдии сатаабаттар, түргэн-тарҕан диэн истиэнэни кырааскалыыллар. Ол эрэн, мин санаабар, обуой дьиэҕэ киһи кута-сүрэ тохтуур, нус бараан тупсаҕай оҥоһуулаах көстүүнү биэрэр.

Кырааскаланар обуой эмиэ баар, 1 рулон 1900 солк., эркини 5-6 сыл кэнниттэн хаста даҕаны хос кырааскалыахха сөп. Маннык обуой кыра оһуордаах-мандардаах, истиэнэни көннөрү кыраасканан соппут курдук биир килээккэй буолбатах», — диэн кэпсиир обуой атыылыыр уол.

Хаартыскаҕа түһэрээри төлөпүөммүн хостообуппар куотунан, маҕаһыынын кэтэҕэр субурус гынан хаалла. Хаһаайын көҥүлэ суох уҥа-хаҥас хамсаныы оҥорботун туһунан өссө төгүл чиҥэтэн биэрдэ, аатын биллэр биричиинэнэн эппэтэ.

Строительнай ырыынак устун салгыы хааман иһэн икки саастаах, харахтарын анна харааран хаалбыт, олохтон дэлби илистибит, сылайбыт көрүҥнээх дьахталлар аттыларыгар тохтоон, атыы-кутуу хайдаҕын туһунан ыйыталастым. Кырааскаламмыт сырдык баттахтааҕа хаһыакка тугу да кэпсиир санаата суоҕун тута биллэрдэ. Биирэ: «Кэпсиэн баҕарбат киһини ыгыма, кини бэйэтэ билэр, тугу да ыйыт, эппиэттиир эбээһинэһэ суох», — диэбитинэн миэхэ ыган кэллэ. Маҕаһыыннарын хаартыскаҕа түһэрбиппин эмиэ сөбүлээбэтилэр: «Көрөн турдахпытына тута соттор!», — диэн ирдэстилэр.

Муоста бүрүөһүнэ

Түһэрбит хаартыскабын сотторон, кэпсэтии тахсыа суоҕун билэн, атын сиргэ бардым. Аны мээнэ киһиэхэ чугаһыахпын хайдах эрэ толлор санаа кэллэ, куруубай атыыһыттарга түбэһэн, ырыынактан үүрүллүбэтэх киһи. Иккис-үһүс этээһи үстэ-түөртэ эргийэн баран ис-киирбэх көрүҥнээх, отутун саҥа ааспыт кыыска чугаһаан: “Өрөмүөн оҥосторго быйыл ханнык матырыйаал «в тренде»”?, —  диэн интэриэһиргээтим.

Кыыһым уп-уһун хойуу кыламаннарынан сапсына түһээт, кэпсээнин кутан-симэн саҕалаата:

«Муоста бүрүөһүнүгэр билигин кварц-винил тутталлар, маннык ламинат быдан чараас эрээри, бөҕө-таҕа оҥоһуулаах, уу түстэҕинэ үллэн тахсыбат. Ону таһынан, таас, винил, кварц-виниловай плитка, керамогранит уураллар. Итинник плитка киһи доруобуйатыгар буортулаах феноловай сымалата суох, сорох бүрүөһүнү маһы үтүгүннэрэн оҥороллор. Мастан уратыта диэн ыарахан ыйааһыннаах тэрил түстэҕинэ алдьаммат, тас көстүүтэ килэрийэн бэрт тупсаҕай көрүҥнээх. Глянцевай билиитэҕэ халтарыйан охтубат туһугар ас астыыр сиргэ муостаҕа коврик тэлгииллэр.

34 кылаастаах кварц-виниловай плитка биир устууката 425 солк., төһө билиитэ киирэрэ хоһуҥ иэниттэн тутулуктаах. Хаачыстыбалаах керамогранит 20 сыл сулууспалыыр, билиитэ үрдүгэр ону-маны түһэрдэххинэ эмтэрийбэт, хайа барбат. Аныгы истииллээх өрөмүөҥҥэ сиэрэй, маҥан, натуральнай таас, мрамор курдук өҥнөөҕү талаллар.

60х60 см. иэннээх керамогранит 1597 солк. саҕаланар, 60х120 см. 2708 солк. Билиитэ эконом-кылаас уонна премиум диэн арахсар», — диэн кэпсиир Антонина, «Строймаркет» маҕаһыын атыыһыта. Ырыынак үрдүнэн кини эрэ аатын эттэ эрээри, хаартыскаҕа түһэртэн аккаастанна.

Жидкай обуой

Хата атыылаһааччы суох буолан, ыйыталаһан истэх аайы кыыс өрөмүөн туһунан каталогун көрдөрө-көрдөрө бэрт элбэҕи сэһэргээтэ. Жидкай обуой диэн баарын туһунан киниттэн саҥа биллим.

Бу декоративнай штукатурка быһыытынан туттуллар сухуой симиэс, ол састаабыгар целлюлоза, хлопок, солко, кырааска киирэр. Жидкай обуой килээккэй, араас текстуралаах, кылабачыгас блесткалаах, оҕуруолаах буолуон сөп. Симиэһи сылаас ууга 10-12 чаас сытыаран үлүннэрэн таһаараллар. Тэҥэ суох истиэнэни, токур муннугу, дьиэ хамсаан, эркин хайа барыытын симиэс үчүгэйдик кистиир, маннык обуой күҥҥэ кубарыйбат, уонча сыл тухары өҥүн уларыппат. Истиэнэҕэ кэлин бээтинэ түстэҕинэ илитэн баран эргэ симиэһинэн сыбаан биэрэллэр. 

Биир упаковка сухуой симиэс (бороһуок) 4 кв.м. тиийэр, сыаната 360 солк.-3000 солк. Истиэнэҕэ обуой курдук көстөр эрээри, бу кырааска, таһын акриловай лааҕынан сотуохха сөп. Каталогу көрдөххө, араас дьэрэкээн быһыылаах, эгэлгэ дьүһүннээх жидкай обуой арааһа үгүс-үтүмэн. Көннөрү обуойтан сыаналаах эрээри, көстүүтэ быдан тупсаҕай.

Сыана 50% тиийэ үрдээтэ

«Тутуу матырыйаалыгар сыана 50% тиийэ үрдээтэ, ол иһин атыы-кутуу аҕыйаата, кыра хамнастаах дьон сыаналаах өрөмүөн кыайан оҥостубаттар. Сыана ыарыан иннинэ улуустан элбэх киһи куоракка киирэн, дьиэ атыылаһар, өрөмүөн оҥостор этилэр. Билигин атыы барбатаҕына олорон хаалбат туһугар урбаанньыттар атын суолу-ииһи, чэпчэки сыаналаах табаары  көрдүүллэр.

Урукку өттүгэр прованс, классика муода этэ, күн бүгүн барыта судургутуйда, лофт, минимализм буолан, биир дьүһүннэх матырыйаалы тутталлар. Өрөмүөн бүддьүөтэ ким төһө улахан дьиэлээҕиттэн, хоһо хайдах туруктааҕыттан, хамнаһын кээмэйиттэн улахан тутулуктаах, онон куукунаны, сааланы бачча сыанаҕа оҥостоҕун диэн чопчу этиллибэт», — диир Антонина.

***                                              ***                                               ***

Ырыынакка тутуу матырыйаала эрэ буолбакка, тоһоҕоҕо тиийэ бытархай тэрил, олоппос, миэбэл барыта баар буолан, дьон наадыйарын мантан булар. Сыана ыараабыт, хамнас ырааҕынан хаалбыт кириизиһэ Дьокуускай куорат Строительнай ырыынагын эмиэ хаарыйда. Атыыһыттар барахсаттар уу чуумпуга чуҥкуйан олорон, киһи киирдэҕинэ тута сүүрэн кэлэллэр, сирэйгин-хараххын маныыллар, атыттар атыы барбатыттан, харчы киирбэтиттэн кыйаханаллар.