Дуоллар ыараатаҕына федеральнай хааһынаҕа халыҥ харчы, үтүмэн үп кутуллан киирэр, ол иһин бүддьүөккэ үп-харчы тиийбэтин итинник толороллор. Былырыын Арассыыйа бэрэсидьиэнэ Владимир Путин анал байыаннай дьайыыны биллэрээтин кытта дуоллар эмискэ үрдээн, сыана хас да төгүл ыараабыта. Билигин Украинаҕа барар буойуннары үбүлүүргэ, кинилэр дьиэ кэргэттэригэр көмөлөһөргө үтүмэннээх үп-харчы ирдэнэр. Онон бүддьүөт ороскуота хас да төгүл улаатта, ону сабарга эбии үп киириэн наада.
Арассыыйаҕа омук сириттэн киирэр табаар кээмэйэ үрдүү, онтон тас дойдуга экспорка тахсар бородууксуйа аҕыйыы турар, онон атыы-эргиэн балаансата уларыйда. Солкуобай сыаната түстэҕинэ, экэниэмикэ эмсэҕэлээн, инфляция өссө үрдүө, дьон дохуота, атыылаһар кыаҕа таҥнары түһүө.
Дуоллар үрдээн, омук сириттэн кэлэр таҥас-сап, гаджеттар, смартфоннар, дьиэҕэ туттуллар тиэхэньикэ, туристическай путевка, сөмөлүөт билиэтэ, массыына сыаната салгыы ыарыыр чинчилээх. Оччотугар бу сайын Таилаҥҥа, Турцияҕа, Кытайга сынньана барааччы биллэрдик аҕыйыан сөп.
Хаартыска: "Парламентская газета"
-
0
-
0
-
0
-
0
-
0
-
1
