Итиччэ киирэр дохуоттан УСН нолуок ыстаапкатын үрдэттэхтэринэ, олохтоох хааһынаҕа киирэр харчы элбиэн сөп. Бүддьүөккэ киирэр үп эбилиннэҕинэ, суол-иис, социальнай эбийиэк тутуута тэтимириэ.
УСН нолуок ыстаапкатын оннунан хаалларыы, эбэтэр үрдэтэн биэрии үгүс урбаанньыттары долгутар. СӨ урбааны уонна туризмы сайыннарарга туһуламмыт судаарыстыбаннай бырагыраама түмүгүн дьүүллэһэр бырабыыталыстыба чааһа сэтинньи 13 күнүгэр Ил Түмэҥҥэ ыытылынна. СӨ урбааҥҥа, атыыга-эргиэҥҥэ уонна туризмҥа миниистирин солбуйааччы Максим Карбушев бырагыраама сүрүн түмүктэрин, урбааны сайыннарарга судаарыстыба туох көмө оҥорорун билиһиннэрдэ.
Уһун-киэҥ сиһилии отчуоту истэн баран урбаан салаатыттан Ил Түмэн саҥа састаабыгар талыллан киирбит дьокутааттар саамай тыын боппуруос билигин УСН ыстаапкатын бигэргэтии буоларын эттилэр.
«УСН ыстаапкатын 2,7% - 4,4% диэри үрдэтиэхтэрин баҕараллар. Өскөтүн дохуоттан төлөнөр нолуок икки төгүл үрдээтэҕинэ, хас биирдии килиэп, үрүҥ-эт ас сыанатыгар 4,4% нолуогу эбиэххэ наада.
Онон дьокутааттар УСН ыстаапкатын көтөҕөртөн туттуналларыгар ыҥырыам этэ. Ахсынньы 1 күнүгэр ити боппуруоһу нолуогабай хамыыһыйа көрбүтүн кэнниттэн Ил Түмэн дьокутааттарын мунньаҕар таһаарыахтара. Кинилэр хайдах куоластыылларыттан УСН нолуогу кытта дьоҕус урбаан салаатыгар үлэлиир олохтоох оҥорон таһаарааччылар бородууксуйаларыгар сыана эмискэ ыарыыра-ыараабата улахан тутулуктаах», — диэн этэр Ирина Котенко, «Дьыалабыай Арассыыйа» эрэгийиэннээҕи салаатын салайааччыта, Ил Дархан иһинэн Урбааҥҥа координационнай сүбэ бэрэссэдээтэлин солбуйааччыта.
Кини УСН муҥутаан кыччатыллыбыт кэмигэр нолуок хомуйуута эбиллибитин бэлиэтээтэ. Күн бүгүн Саха Сиригэр УСН ыстаапката дохуокка 2,7%, дохуоттан көҕүрэтиллэр ороскуокка 6,7%. Өскөтүн дохуокка 4,4%, дохуоттан көҕүрэтиллэр ороскуокка 8,4% диэри үрдэттэхтэринэ, сорох урбаанньыттар күлүккэ киирэн, дохуоттарын көрдөрбөккө эрэ үлэлиэхтэрин сөп, оччотугар олохтоох бүддьүөккэ үп-харчы киирэрэ бытаарар чинчилээх.
Биир өттүнэн, өскөтүн урбаанньыт сыанатын үрдэтэр түгэнигэр, нолуогун эмиэ үрдэтиллибит ыстаапканан төлүөхтээх. Холобур, былырыын ынах этэ 600-700 солк. этэ, быйыл 800-1500 солк. тиийдэ, арыы 650 солк. – 1300-1500 солк. диэри эмискэ ыараата.
Көҥүл ырыынакка киирэн, урбаанньыттар сайынныннар диэн судаарыстыба сыананы хонтуруоллаабат. Оччотугар саатар нолуогу үрдэтэн, бүддьүөккэ киирэр харчыны элбэтиэн сөп этэ. УСН ыстаапката биһиги өрөспүүбүлүкэбитигэр дойду үрдүнэн биир саамай намыһах. Арассыыйаҕа УСН базовай ыстаапката дохуокка 6%, дохуоттан көҕүрэтиллэр ороскуокка 15%.
Ону киитэрэй атыыһыттар УСН нолуога үрдээтэҕинэ, сыаналарын өссө хас да төгүл эбиэхтэрэ. Түмүгэр кыра хамнастаах, биэнсийэлээх дьон ночоотуран тахсыахтара. Кэлэр сылга УСН ыстаапката үрдээтэҕинэ, килиэппит, эппит-арыыбыт сыаната эмискэ өрө көтөн тахсар кутталлаах.
-
0
-
0
-
0
-
0
-
1
-
0
