Оччотугар кыра хамнастаах эрэгийиэннэргэ ипотека бырыһыана кыра буолуохтаах, оттон орто хамнас үрдүк сиригэр кирэдьиит ыстаапката үрдүөхтээх. Саха Сиригэр 2023 с. бастакы аҥаарыгар статистика хараҕынан, орто хамнас 104 548 солк. тиийбитэ, онон ипотека бырыһыана муҥутуур үрдүк буолара күүтүллэр.
Дойду Киин Баанын салайааччыта Эльвира Набиуллина Госдума бэрэссэдээтэлин этиитин өйүүрүн биллэрбитэ, ону таһынан, эрэгийиэҥҥэ тутуу кээмэйин, төһө улахан суумалаах ипотека бэриллэрин учуоттуур наадалааҕын бэлиэтээбитэ. Кини дьокутааттар Бырабыыталыстыбаны кытта бу боппуруоһу быһаарарга бииргэ үлэлэһэллэригэр сүбэлээбитэ.
Госдума үп-харчы ырыынагар кэмитиэтин бэрэссэдээтэлэ Анатолий Аксаков эрэгийиэннээҕи ипотека усулуобуйатын тохсунньу 20 күнүттэн саҕалаан, Бырабыыталыстыбаны уонна Киин Бааны кытта көрүөхтээхтэрин туһунан иһитиннэрбитэ.
Кини этэринэн, сорох эрэгийиэннэргэ быраастар, оробуочайдар, тыа хаһаайыстыбатын үлэһиттэрэ тиийбэттэр, кинилэри олохсутарга чэпчэтиилээх ипотеканы киллэриэхтэрэ. Оччотугар Бырабыыталыстыба бырыһыан ыстаапкатын субсидиялыан, Киин Баан кинилэри кытта үлэлэһэр бааҥҥа чэпчэтии биэриэн сөп.
Итинэн сылыктаатахха, биһиги өрөспүүбүлүкэбитигэр ипотека бырыһыана орто хамнаһы батыһан, үрдүөн сөп, оттон быраастарга уонна кэккэ наадалаах үлэһиттэргэ төттөрүтүн намтыаҕа.
Дьиҥэр, Саха Сиригэр орто хамнаһы 104 548 солк. киһи барыта ылбат, итинтэн икки төгүл кыра хамнастаах дьон үгүс. Онон эрэгийиэннээҕи ипотека бырыһыанын олохтуурга хас биирдии киһи төһө хамнаһы илиитигэр ыларын учуоттуур тоҕоостоох этэ. Хамнас алын кээмэйин ылар дьон хайдах кинилэргэ сыһыана суох орто хамнаһынан ипотекаларын төлүөхтэрэй?
Хаартыска: https://podrobno.uz/redactor/novostroiki-v-tashkente-problemi-i-resheniya/
-
0
-
0
-
0
-
0
-
0
-
0
