Мунньаҕы сис кэмитиэт бэрэссэдээтэлэ Павел Петров тэрийэн ыытта. СӨ тырааныспарга уонна суол хаһаайыстыбатыгар миниистир солбуйааччыта Ольга Рафаилова өрөспүүбүлүкэҕэ тырааныспар ситимин сайыннарыыга судаарыстыбаннай бырагыраама 2023 с. түмүктэрин билиһиннэрдэ.
Былырыын Саха Сиригэр тырааныспар ситимин сайыннарарга 21 млрд. солк. үп көрүллүбүт, онтон өрөспүүбүлүкэ бүддьүөтэ 15,5 млрд. солк., федеральнай бүддьүөт 4,5 млрд. солк. үбүлээбит, ону таһынан, ороскуоту олохтоох бүддьүөт уйуммут уонна таһыттан үп киирбит.
2023 с. 431,48 км. уһуннаах суол оҥоһуллубут, Мэҥкүлэ, Томпорук, Нүүйэ өрүһү туоруур үс күргэ тутуллубут, Дьокуускайга Ленин аатынан проспект хапытаалынай өрөмүөнэ түмүктэннэ. “Куттала суох, хаачыстыбалаах суол-иис” национальнай бырайыак чэрчитинэн 299,65 км. суол оҥоһуллубут. Онон суолу оҥорууга өрөспүүбүлүкэ Уһук Илин бастакы миэстэҕэ тахсыбыт.
Дьон сөмөлүөтүнэн көтөргө билиэт атыылаһарыгар субсидия оҥорорго уопсайа 1028,1 мөл. солк. көрүллүбүт. Субсидияламмыт билиэтинэн 60,5 тыһ. киһи туһаммыт.
Өрүһүнэн айаны үбүлүүргэ 14 социальнай хайысхаҕа 129,9 мөл. солк. тыырыллыбыт, субсидияламмыт билиэти 26,2 тыһ. киһи атыыласпыт. Дьаархан уонна Маалыкай икки ардыгар айанныырга субсидияны олохтооһун саҕаланна.
Дьокуускай куоракка оптуобустары саҥардыы тиһигин быспакка ыытыллар, былырыын 50 саҥа оптуобус кэлбит, өссө 53 оптуобуһу атыылаһарга хантыраак түһэрсибиттэр. Ааспыт сылга Аллараа Бэстээх – Чурапчы хайысхатынан оптуобус сырыыта саҕаланна.
2022 с. кытта тэҥнээтэххэ, 2023 с. түмүгүнэн дьон суолга саахалланан эмискэ олохтон туорааһына 13,6% аҕыйаабыт.
Тустаах министиэристибэ суолу-ииһи оҥорууга, тырааныспар сырыытын тупсарыыга 2023 с. туох-ханнык үлэни ыыппытын истэн баран дьокутааттар Ольга Рафаиловаҕа үгүс-үтүмэн ыйытык биэрдилэр.
Ил Түмэн бэрэссэдээтэлин солбуйааччы Афанасий Владимиров Хаҥалас улууһугар дебаркатердары, Батамайга диэри суолу тутуу хаһан ыытылларын ыйыталаста. Сайын куорат олохтоохторо өрөбүллэригэр Өлүөнэ очуостарыгар массыынанан сынньана барыахтарын суол-иис мөлтөҕө, паром сорох сиргэ кыайан сылдьыбата атахтыыр.
СӨ тырааныспарга уонна суол хаһаайыстыбатыгар миниистир солбуйааччыта Ольга Рафаилова былырыын үстэн итэҕэһэ суох дебаркатердары тутуу туһунан кэпсэтии барбытын, быйыл бүддьүөккэ көннөрүү киирдэҕинэ ити боппуруоһу өйүөхтэрэ диэн эрэнэрин биллэрдэ. Кини «Умнас» эрэгийиэннээҕи суол икки учаастага быйыл оҥоһуллуохтааҕын туһунан эттэ.
Сис кэмитиэт мунньаҕын туһунан сиһилии «Ил Түмэн» хаһыат кэлэр нүөмэригэр ааҕыҥ.
- 0
- 0
- 0
- 0
- 0
- 0