Судаарыстыбаннай Дуума Бэрэссэдээтэлэ Вячеслав Володин «Арассыыйа тимир суоллара” АУо салалтата дьокутааттартан киирбит ыйытыктарга, нэһилиэнньэ туруорсуутугар улахан болҕомто уурара хампаанньа дьон туһугар үлэлиирин туоһута буоларын бэлиэтээтэ. Кини тимир суол ситимэ салгыы сайдарын туһугар сокуон тиһилигэ оҥоһуллуохтааҕын туһунан эттэ.
Олег Белозеров тэрилтэ 186 сыл устата дьону-таһаҕаһы тиэйэн кэлбит баай устуоруйалаах хампаанньа буоларын туһунан кэпсээтэ. Дойду тырааныспарын ситимигэр тимир суолунан табаар 85% тиэллэр, айанньыттар 28% айанныыр.
«Арассыыйа тимир суоллара» былырыын күһүн акционернай хампаанньа тэриллибитэ 20 сыллаах үбүлүөйүн бэлиэтээбитэ. Ити кэм устата вагоннар саҥардыллан, тупсан иһэллэр, пуойастар хойутаабакка кэлэллэр, оттон ыраах айанныыр дьону ыраас утуйар таҥаһынан хааччыйаллар. Вокзаллар эмиэ өрөмүөннэнэн, ырааһыран, урукку курдук умнаһыттар мустар сирдэрэ буолбатах.
Күн бүгүн икки этээстээх пуойастар, биир чааска 281 км. барар түргэн «Сапсаннар» дьону таһаллар. Аныгы олох сиэринэн тиэхэньикэни пилота суох оҥоһуу өй салайан эрэрин туһунан тэрилтэ генеральнай дириэктэрэ иһитиннэрдэ.
«Арассыыйа тимир суолларын» дохуота сыл ахсын үрдээн, былырыын 2,6 трлн. солк. тиийдэ, хампаанньа сылга 2,5 мөл. риэйсэни оҥорон, 1,2 млрд. дьону дойду араас куораттарыгар тиэрдэр. Кэлиҥҥи уон сыл иһигэр тимир суол үлэһиттэрэ дьону тиэйиигэ историческай муҥутуур үрдүк көрдөрүүнү ситистилэр.
Олег Белозеров дойду тимир суолугар 900 тыһ. кэриҥэ киһи үлэлиирин, үлэһиттэри уһуйаантан, оскуолаттан саҕалаан идэҕэ бэлэмнииллэрин туһунан билиһиннэрдэ. Кини этэринэн, хамнас сылга иккитэ үрдүүр, инфляцияны куоһарар таһымынан эбиллэр.
Оробуочай, монтер 87 000 солк., машинист 113 000 солк. хамнастаах, сэдэх идэлээх дьон хамнастарыгар эбии төлөбүр ылаллар. Ол да буоллар, үлэһит тиийбэтэ ахтылынна. Үлэһиттэр 2-4% ипотеканан туһаналлар, оҕо төрөөтөҕүнэ тэрилтэ 100 000 - 200 000 солк. биэрэр эбит. Эдэр ийэлэри өйүүр сыалтан корпоративнай босуобуйанан, дистанционнай үлэнэн хааччыйаллар. Эр дьонтон хаалсыбакка пуойаһы ыытар кэрэ аҥаардар эмиэ бааллар.
«Арассыыйа тимир суоллара» мобильнай сыһыарыыны арыйан, дьон дьиэ кэргэнинэн дойду хайа баҕарар уһугар сынньана баралларын тэрийэргэ эмиэ үлэлэһэр. Ыраах айаҥҥа дьон чуҥкуйбатын туһугар куйаар ситиминэн хааччыйаллар, оҕолоох дьоҥҥо купеҕа айанныырга чэпчэтии оҥоһуллар.
Дойду Бэрэсидьиэнэ Владимир Путин Туһаайан этиитигэр олоҕуран, Москваттан Санкт-Петербурга, Уралга, Минскэйгэ, Хара муора куруортарыгар айанныырга түргэн, сыыдам сырыылаах пуойастар сылдьыахтаахтар.
Ол туһунан сиһилии «Ил Түмэн» хаһыат кэлэр нүөмэригэр ааҕыҥ.
Хаартыска: https://www.vedomosti.ru/business/articles/2019/12/01/817583-rzhd-nachnet, http://duma.gov.ru/, https://www.oka.fm/new/read/social/RZHD-zapustyat-novyj-neobychnyj-poezd-v-2024-godu/, https://rzdtour.com/vidyi-vagonov/kupe
- 0
- 0
- 0
- 0
- 0
- 0