Оччотугар Уһук Илин сир баайын хостуур хампаанньалар сайдыахтара, Азия, Чуумпу акыйаан дойдуларын кытта табаары тиэйии сыыдамсыйыа. Хампаанньа быйыл үйэ мэҥэ бырайыага Байкаал-Амуур Магистрала (БАМ) тутуута саҕаламмыта 50 сыллаах өрөгөйдөөх үбүлүөйүн көрсөргө бэлэмнэнэр.
Ааспыт нэдиэлэҕэ Судаарыстыбаннай Дуумаҕа «Арассыыйа тимир суоллара» АУо генеральнай дириэктэрэ, бырабылыанньа бэрэссэдээтэлэ Олег Белозеров хампаанньа үлэтин түмүгүн, инники былааннарын билиһиннэрдэ уонна дьокутааттар, фракциялар ыйытыктарыгар хоруйдаата.
Тимир суол тэрилтэтэ 186 сыл устата дьону, таһаҕаһы тиэйэн кэлбит баай устуоруйалаах хампаанньа. Манна күн бүгүн 900 тыһ. кэриҥэ киһи үлэлиир. Хара муора туһаайыытынан Арассыыйа соҕуруу эҥэригэр аэропуортар хаһыс да сылларын сабыллан тураллар, ол иһин сайыҥҥы уоппуска кэмигэр куруорка дьону таһарга пуойас сырыыта элбээн биэриэ. Ыраах айанныыр дьоҥҥо табыгастаах усулуобуйаны хааччыйарга душтаах, суунар хостоох вагоннар, салгыны ыраастыыр тэриллэр баар буоллулар. Иккилии этээстээх 1100 тахса пуойастар 32 хайысханан айанныыллар.
«Арассыыйа тимир суоллара» АУо генеральнай дириэктэрэ Олег Белозеров отчуотун истэн баран, дьокутааттар үгүс-үтүмэн ыйытыктары биэрдилэр. КПРФ фракциятыттан Судаарыстыбаннай Дуума дьокутаата Нина Останина Москубаттан Краснодаарга диэри үс оҕолоох дьиэ кэргэн билиэтэ 15% чэпчэтиинэн 61 000 солк., оттон Владивостоктан айан ороскуота 231 000 солк. буоларын эттэ.
Онуоха Олег Белозеров: «Урукку өттүгэр үс уонна онтон элбэх оҕолоох ыалга чэпчэтии оҥоһуллар этэ, онтон быйыл Дьиэ кэргэн сылыгар оҕолоох ыалларга барыларыгар итинник чэпчэтии баар. Дьону тиэйии тарыыбын 59% федеральнай антимонопольнай сулууспа олохтуур. Уоппуска кэмигэр удамыр сыаналаах билиэттэри олохтуурга субсидия бырагырааматын кэҥэтиэххэ наада», — диэн хардарда.
Онон 2024с. оҕолоох дьиэ кэргэн хайа баҕарар хайысханан тимир суолунан айанныырга 15% чэпчэтиинэн туһаныахтара.
Хаартыска: РЖД саайтыттан
-
0
-
0
-
0
-
0
-
0
-
0
