Аныгы олох сиэринэн пуойаһы пилота суох оҥоһуу өй салайан эрэрин туһунан тэрилтэ генеральнай дириэктэрэ иһитиннэрдэ. «Арассыыйа тимир суолларын» дохуота сыл ахсын үрдээн, былырыын 2,6 трлн. солк. тиийдэ, хампаанньа сылга 2,5 мөл. сырыыны оҥорон, 1,2 млрд. дьону дойду араас куораттарыгар тиэрдэр. Кэлиҥҥи уон сыл иһигэр тимир суол үлэһиттэрэ дьону тиэйиигэ историческай муҥутуур үрдүк көрдөрүүнү ситистилэр.
ЛДПР фракциятыттан Судаарыстыбаннай Дуума дьокутаата Сергей Леонов Москуба-Смоленскай-Миинискэй хайысхатынан түргэн сырыылаах тимир суол тутулуннаҕына, бу дойдуттан төрүттээх Юрий Гагарин төрөөбүтэ 90 сылынан сибээстээн, пуойаска кини аатын иҥэрэргэ этии киллэрдэ.
«Сиэрдээх Арассыыйа — Патриоттар кырдьык туһугар!» фракция салайааччытын бастакы солбуйааччыта, Судаарыстыбаннай Дуума дьокутаата Олег Нилов тыа хаһаайыстыбатын бородууксуйатын тас дойдуга таһаарарга бурдугу тиэйэр вагоннар тиийбэттэрин бэлиэтээтэ.
«Арассыыйа тимир суоллара» АУо генеральнай дириэктэрэ быһаарбытынан, күн бүгүн 67 000 тахса вагон бурдугу тиэйэр, былырыын кинилэр ахсааннара 9000-нан эбиллибит. Билигин 1500 вагон суолга турарын, ону хаһан сүөкүүллэрин кэтэһэллэрин туһунан эттэ.
Судаарыстыбаннай Дуума Бас билиигэ уонна сир сыһыаннаһыыларыгар сис кэмитиэтин бэрэссэдээтэлэ, КПРФ фракция бэрэстэбиитэлэ Сергей Гаврилов тимир суолу дойду илин өттүгэр хайыһыннарбыт Сэбиэскэй кэм улуу тутуута БАМ 50 сылынан сибээстээн, түргэн сырыылаах магистраль тутуута киин уобаластарынан муҥурданыа суохтааҕын санатта.
Электричканан куорат таһыгар айанныыр салаа Москубаттан уонна Санкт-Петербург куораттан ураты ночооттоох буолан, НДС-ка нуул ыстаапканы 2035 сылга диэри уһатан биэрбиттэрэ. Тустаах сокуону былырыын Судаарыстыбаннай Дуума ылыммыта. Ону таһынан, 7 диэри саастаах оҕолор ити хайысханан босхо сылдьаллар.
Ыраах айанныыр дьоҥҥо табыгастаах усулуобуйаны хааччыйарга душтаах, суунар хостоох вагоннар, салгыны ыраастыыр тэриллэр баар буоллулар. Иккилии этээстээх 1100 тахса пуойастар 32 хайысханан айанныыллар.
Дьокутааттар Кытай Шанхай куоратыгар биир чааска 400-600 км. элэҥнэтэн ааһар түргэн пуойас сылдьарын туһунан эппиттэригэр Олег Белозеров ол төһө куттала суоҕа уонна көдьүүстээҕэ ситэ үөрэтиллэ илигин бэлиэтээтэ.
Оттон Саха Сиригэр Аллараа Бэстээххэ тимир суол кэлиэҕиттэн Владивосток, Благовещенскай, Иркутскай хайысхаларынан дойду хайа баҕарар куоратыгар айанныахха сөп.
Хаартыска: https://teknoblog.ru/2020/07/20/106635
-
0
-
0
-
0
-
0
-
0
-
0
