Бэҕэһээ эбиэт саҕана уонна киэһэ үлэм кэнниттэн 203 түөлбэҕэ баар «Пятерочкаҕа» тиийэн сыана хайдаҕын көрөргө сананным. Арай тиийбитим дьон куорат араас уһугуттан массыынанан тоҕуоруһан кэлбиттэр, маҕаһыыҥҥа киирбитим аан айаҕыттан дьон тобус-толору, каассаҕа уһун уочарат.
Дьон кэпсииринэн маҕаһыын аһыллар күнүгэр холодильник өстүөкүлэ аана бытарыйан түһүөр диэри харбыаласпыттар. Каартанан кассира суох бэйэҥ төлүүр терминалгын үнтү талкыйан үлэлээбэт оҥорбуттар.
«Пятерочкаҕа» бэйэлэрэ килиэп, бурдук ас буһаран атыылыыллар эбит, итиэннэ сылыттыҥ да сиир бэлэм ас баар, бородуукта эрэ буолбакка, шампунь, тиис суунар пааста, бытовой химия арааһа полкаҕа кэчигирэспиттэр. Хортуоппуйтан саҕалаан, авокадоҕа тиийэ оҕуруот аһын уонна фрукта арааһа.
Сыана оннук айылаах чэпчэкитэ көстүбэт, холобур, «Провансаль» майонез 189 солк., “Янта” 249 солк., “Рогачев” сгущеннай үүт 169 солк., кыра бааҥкалаах барыанньа 169 солк., «Global Village» соччо биллибэт сок 129 солк., бааҥкалаах кофе 349 солк., кыра йогурт 85-91 солк., «Простоквашино» 25 % сүөгэй 159 солк. Кэккэ табаарга сыана ыарахан, оттон туохха эрэ чэпчэки.
Үгүс саха киһитэ үүттээх чэйи иһэрин сөбүлүүр. Саамай сөхпүтүм 2,5% «Домик в деревне» үүт 186 солк., оттон дьиэ таһынааҕы маҕаһыыҥҥа 145 солк. Онон атын маҕаһыыннартан сыана манна чэпчэки буолуо диэн күүппүппүт туолбата.
Уочаракка чаас аҥаара тура сатаан баран тугу да атыыласпакка тахсан бардым.
Ааптар хаартыскаҕа түһэриилэрэ.
- 0
- 0
- 2
- 2
- 1
- 1