СӨ Тырааныспарга уонна суол хаһаайыстыбатыгар миниистирин солбуйааччыта Ольга Рафаилова этэринэн, 2024 с. бүтүөр диэри түөрт SukhoiSuperJet-100 сөмөлүөттэри «Аврора» авиахампаанньаттан «Якутия» авиахампаанньа субарендаҕа ылыахтаах.
Казань куоракка оҥоһуллар 210 миэстэлээх Ту-214 аныгы магистральнай 12 сөмөлүөтү өрөспүүбүлүкэҕэ 2025-2030 сс. аҕаларга кэпсэтии барар.
«Полярные авиалинии» авиахампаанньаҕа 2032 с. диэри уон Ми-8 МТВ-1 бөртөлүөттэри, түөрт «Байкал», алта «Ладога», эбэтэр Ил-114-300 сөмөлүөттэри аҕаларга былаан оҥоһуллубут. 2023 с. икки бөртөлүөтү аҕаларга дуогабар түһэрсибиттэр.
«АЛРОСА» авиахампаанньаҕа 2029 с. диэри түөрт Ми-8 МТВ бөртөлүөтү, үс Ил-114-300, түөрт МС-21 уонна икки SukhoiSuperJet-95 сөмөлүөтү ылыахтаахтар.
Өрөспүүбүлүкэ Уһук хоту, кытыы нэһилиэктэригэр салгын тырааныспарынан социальнай суолталаах табаары, дьону тиэйэргэ Аартыка оройуоннарыгар саҥа сөмөлүөттэри түһэрэргэ уопсайа 59 былаһаакка оҥоһуллуохтаах. Бу үлэ 2024 с. саҕаланыахтаах. СӨ Тырааныспарга уонна суол хаһаайыстыбатыгар министиэристибэтэ көтөр аал түһэр былаһааккаларын чинчийэн, докумуоннары Росавиацияҕа ыыппыт.
Уһук Илин дьоҕус авиацияны сайыннарарга РФ Илин эрэгийиэннэрин сайыннарар министиэристибэ «Байкал» сөмөлүөттэр түһэр былаһааккаларын бэлэмнииргэ биир кэлим былаан оҥорорго үлэлэһэр.
Хартыска: www.aex., topwar.ru
-
2
-
0
-
0
-
0
-
0
-
0
