Александр Иванов өрөспүүбүлүкэ судаарыстыбаннай иэһэ 52 млрд. солк. оттон тиһэх кирбии 89 млрд. солк. буоларын санатта. Быйыл төһө улахан иэскэ киирээри олорорбутун интэриэһиргээтэ.
Валерий Жондоров судаарыстыбаннай иэс 30% буоларын бэлиэтээн туран, куттала суох кирбиигэ баарбытын иһитиннэрдэ. Бүддьүөт дохуотун туолуута былаан быһыытынан баран иһэр, бүддьүөт бары тэрилтэлэригэр быйыл хамнас, хомунаалынай өҥө үрдээн, ороскуот 8 млрд. солк. аһары барбыт.
Гаврил Парахин 2024 с. успуорка 7,2 млрд. солк. көрүллүбүтүттэн үөрэрин, ол да буоллар, син биир ити салааҕа харчы тиийбэтин туһунан эттэ. Судаарыстыбаттан үбүлэнэр сонуну киэҥ эйгэҕэ тарҕатар салааҕа 2 млрд. солк. тоҕо эбии көрбүттэрин токкоолосто. Кини успуорт 26 көрүҥүнэн күрэхтэһиилэргэ барарга бүддьүөккэ харчы суоҕуттан сылтаан, оҕолор атын куораттарга көтөр кыахтара суоҕун, талааннаах оҕо үксүн кыаммат ыалга төрүүрүн бэлиэтээтэ. Оҕону сайыннарарга, кыаҕын арыйарга, күрэхтэһиигэ ыытарга төрөппүттэр уонна тириэнньэрдэр харчыны көрдүүллэрэ сыыһатын биллэрдэ. Успуорт сайдыытыгар улахан болҕомтону уурдахха, ыччат ортотугар буруйу оҥоруу аҕыйыан, чөл олоххо тардыһыы күүһүрүөн сөбүн, ону таһынан, доруобуйаларынан хааччахтаах дьону өйүүргэ үп-харчы наадатын эттэ.
Дьокутаат урбаанньыттарга судургутуллубут нолуок ыстаапката үрдүөн иннинэ 1 мөл. солк. дохуоттарыттан 10 000 солк. төлүүллэрин, оттон билигин 44 000 солк. төлүөхтээхтэрин иһитиннэрдэ. Ону таһынан, хамнаһы, хомунаалынай өҥөнү, сылаас гарааһы төлүүргэ ороскуоттарын аахта. Онон урбаанньыттар атын суолу-ииһи көрдүүргэ күһэллэллэрин биллэрдэ.
Светлана Давыдова өскөтүн билигин эбии үбүлээһин көрүллүбэтэҕинэ, босхо эминэн хааччыллар нэһилиэнньэ араҥата атырдьах ыйыгар эмэ суох хаалар кутталлааҕын иһитиннэрдэ. Күн бүгүн 200 000 кэриҥэ дьон итинник чэпчэтиинэн туһанар.
Валерий Жондоров аны күһүн бүддьүөккэ уларытыылары киллэрэргэ ити боппуруоһу көрүөххэ сөбүн туһунан эппитигэр, Светлана Давыдова эми атыылаһарга бириэмэ барарын, сыл бүтүүтэ биирдэ кэлиэн туһунан эттэ.
Ил Түмэн Бэрэссэдээтэлэ Алексей Еремеев нэһилиэнньэни эминэн хааччыйыыга Светлана Давыдова эппит туруорсуутун толору кээмэйин толороллорун туһунан иһитиннэрдэ. Кини бүддьүөккэ уларытыылары киллэрэргэ, бастатан туран, тыа хаһаайыстыбатын өйүүргэ болҕомто ууруллубутун бэлиэтээтэ. Бу салааҕа эбии 795 мөл. солк. көрүлүннэ, онон ыһыы үлэтигэр, оту хаһаанарга көрүллүбүт үп-харчы тыа хаһаайыстыбатын үлэһиттэригэр тиийиэхтээх.
Хаартыска: https://www.9111.ru/questions/77777777723486120/
-
0
-
0
-
0
-
0
-
0
-
0
