Сокуон быһыытынан, биир көлүөһэҕэ 7 туонна көҥүллэнэр, оттон кураанах массыына ыйааһына 22 туонна. Кинилэр биир көлүөһэҕэ 3 туоннаны тиэйэллэрин, урбаанньыттар ыарахан кыамталаах тиэхиньикэни атыылаһан баран үтүмэннээх нолуогу, ыстараабы төлүүллэрин, онтон сылтаан үлэлиир кыахтара суоҕун кэпсээтэ. Онон нормативы улаатыннаран, биир көлүөһэҕэ 9-10 туоннаҕа тиэрдэр наада диэтэ. Ол кыаллыбатаҕына, бородууксуйаны сайын уу суолунан, эбэтэр кыһын ыйааһыны хонтуруоллуур тэрил үлэлээбэт кэмигэр таһарга эттэ.
Тырааныспар уонна суол хаһаайыстыбатын миниистирэ Владимир Сивцев «Якутцемент» тэрилтэҕэ ыйааһын баарын, массыына төһөнү тиэйэрин кэмнээн биэрэллэрин туһунан эттэ. Кытайга оҥоһуллубут карьернай самосвал суолу алдьатарын, бу тиэхиньикэ аспаалынан айанныырга буолбакка, карьерга үлэлииргэ оҥоһуллубутун санатта. Ирбэт тоҥҥо турар Дьокуускай суола 80-ча туонналаах ыарахан тырааныспарга анамматах. Эрэгийиэн уонна куорат суоллара биир көлүөһэҕэ 11,5 туоннаны уйаллар.
Массыына төһө таһаҕаһы тиэйиэхтээҕэ РФ Бырабыыталыстыбатын уурааҕар ыйыллан турар, ол ирдэбили Арассыыйа үрдүнэн бары эрэгийиэннэр тутуһуохтаахтар, кэһии таҕыстаҕына, ыстарааптаныахтаахтар. Наада буоллаҕына, нуормаламмыт быраап аакталарыгар уларытыылары киллэриини көҕүлүөххэ сөбүн туһунан миниистир иһитиннэрдэ.
Сүрүн дакылааччыттары истэн баран, дьокутааттар ыйытыктары биэрдилэр. Владимир Федоров сэбиэскэй кэмтэн баччааҥҥа диэри массыына ыйааһынын хонтуруоллаабакка олорон баран, билигин туохтан сылтаан хамсаммыттарын туоһуласта. Табаары тиэйиигэ биир да судаарыстыбаннай тэрилтэ суоҕун, барытын чааһынай урбаанньыттар таһалларын, онон маннык ньыма үтүө түмүккэ тиэрдибэтин, тутуу матырыйаалын сыанатын ыаратарын эттэ.
Миниистир 2020 с. Арассыыйа үрдүнэн таһаҕаһы тиэйии быраабылатын туһунан Бырабыыталыстыба уурааҕа тахсыбытын, бастаан «Куттала суох, хаачыстыбалаах айан суола», билигин «Олох инфраструктурата» национальнай бырайыактар ирдэбиллэринэн, бары субъектарга АПВГК туруоруллуохтааҕын бэлиэтээтэ. Маннык миэрэ эрэгийиэн, куорат суола алдьанарын тохтотор, аспаалы харыстыыр сыаллаах ыытыллар диэтэ.
Холобур, «Умнас» суолга АПВГК-ны эргийэн барар суолу саппыттарын кэнниттэн тимир көлөлөр нүөмэрдэрин устан, эбэтэр сабан баран айанныыллар эбит.
Норуот дьокутаата Василий Николаев Ленскэй уонна Мииринэй икки ардыгар ыйааһыны хонтуруоллуур пууну туруордахха, «АЛРОСА» хайдах үлэлиирин токкоолосто. Кэлиҥҥи биэс сылга суол өрөмүөнүгэр 13 млрд. солк. ороскуоттаммытын учуоттаан, суолбут алдьамматын туһугар кыһаллыахтаахпытын бэлиэтээтэ. Ирбэт тоҥ үрдүгэр ноҕурууска өссө кыра буолуохтааҕын санатта.
Владимир Сивцев суол күөрэ-лаҥкы түспэккэ, итиннэ оҥхой, манна дьаама буолбакка, айанныырга табыгастаах буоларын тутуһуохтаахпыт диэтэ.
Даҕатан эттэххэ, улахан массыыналар куорат эрэ суолун алдьатар буолбатахтар, тыа сиригэр кутуу суолунан таһаҕаһы тиэйбиттэрин кэнниттэн, ардах түстэҕинэ ол дьаамаҕа «Hiace» микрооптуобус таксилар батыллаллар, ону хостуохтарыгар диэри дьон таһырдьа олороругар тиийэр. Ол иһин маннык пууннары туруоруу саамай сөптөөх дьаһал.
Василий Кононов, ааптар хартыскаҕа түһэриитэ.
-
1
-
0
-
0
-
0
-
0
-
0
