Уу суолунан оттугу тиэйии былаана 99 % туолбут, 464 000 туонна оттук тиэрдиллибит. Кыһыҥҥы суолунан 724 000 туоннаны тиэйиэхтээхтэр. Оттугу тиэйии төлөбүрүн кэлин төлөһөргө диэн ыытыллар, онон оттук саппааһа кыһыҥҥы суол аһыллыар диэри тиийиэхтээх.
Ааспыт оттук сезонугар Алдан, Нерюнгри, Эдьигээн, Уус Алдан, Уус Маайа, Хаҥалас улуустарыгар саахал тахса сылдьыбыт. Онон сылыктаатахха, ОДьКХ ситимэ улаханнык эргэрбит-элэйбит. Сылааһы хааччыйар тэрилтэлэр ситэри үбүлэммэтэхтэриттэн итинник быһыы-майгы тахсыбыт.
2019-2024 сс. «Ыраас уу» национальнай бырайыак чэрчитинэн 8 эбийиэк тутуллубут, 2025 с. Өлүөхүмэҕэ ууну ыраастыыр ыстаансыйа тутуутун иккис түһүмэҕэ бүтүөхтээх. Нэһилиэнньэни ыраас уунан хааччыйыы 60 %-ҥа тиийбит.
Дьокуускай соҕуруу өттүгэр «Звезднай» диэн саҥа түөлбэҕэ, олохтоохтору уунан хааччыйарга саҥа ситим тутуллар.
Быйылгыттан өрөспүүбүлүкэ «Олох инфраструктурата» национальнай бырайыак чэрчитинэн «Хомунаалынай инфраструктураны саҥардыы» федеральнай бырайыакка киирбит. 2030 сылга диэри 140 000 киһи нэһилиэнньэни хабан туран, хомунаалынай өҥө хаачыстыбата тупсуохтаах, ууну биэрэргэ 14 эбийиэк тутуллуохтаах.
2026-2027 сылларга 4 хочуолунай тутуллуохтаах, 80 км. усталаах инженернай ситим саҥардыллыахтаах. Кэлэр биэс сылга хомунаалынай ситим 155 эбийиэгин тутуута уонна өрөмүөнэ ыытыллыахтаах, 6100-тэн тахса км. усталаах уу турбата оҥоһуллуохтаах. Ону олоххо киллэрэргэ 29 млрд. солк. көрүллүөхтээх.
Энергетикаҕа уот кыамтатын улаатыннарыахтаахтар, саахал тахсарын аҕыйатыахтаахтар. Маны ситиһэргэ түөрт улахан бырайыак баар, Ленскэйгэ Новоленскэй ТЭЦ, Чульмаҥҥа Саха Сирин соҕуруу өттүн хааччыйар ТЭЦ, Дьокуускайдааҕы ГРЭС иккис уочарата тутуллуохтаах, Нерюнгрига ГРЭС кэҥэтиллиэхтээх. Быйыл Илиҥҥи экэнэмиичэскэй пуорумҥа Аллараа Халыма улууһугар, Черскэйгэ, мобильнай энергоситим үлэҕэ киирбитин көрдөрдүлэр.
Эрэдээксийэ хаартыската.
-
0
-
0
-
0
-
0
-
0
-
0
