-- Аартыка улуустара логистика кииннэрэ туһалаахтарын номнуо билэн олороллор. Онон туһааннаах киин аһыллыытын муомалар кэтэспиттэрэ быданнаата.
Билигин наадалаах ас-үөл тиийимтиэ уонна удамыр сыаналаах буолуоҕа. Кииҥҥэ оҕуруот аһын харайар, сылаас уонна тымныы ыскылааттар, киэҥ-куоҥ атыы-эргиэн саалата баар. Олохтоохтор сылы эргиччи хаачыстыбалаах аһы-үөлү атыылаһар кыахтаннылар. Эргиэн-логистика кииннэрин үлэлэрин биир хайысхатынан олохтоох бородууксуйаны өйөөһүн буолар. Онон олохтоох бородууксуйаны соҕотуопкалыахтара, сир аһыттан саҕалаан балыкка тиийэ. Муома улууһун олохтоохторо логистика киинин нөҥүө тутуу матырыйаалын аҕалтарарга интэриэстээхтэр. Бу аата дьон-сэргэ төрөөбүт дойдуларыгар олорор баҕалаахтарын этэр, — диэн Ил Дархан телеграм-ханаалыгар суруйда.
Саха Сиригэр бу онус Эргиэн-логистика киинэ буолар. Сүрүн соруга – уустук суоллаах Муома улууһун сыл устата тохтоло суох сүрүн аһынан-үөлүнэн хааччыйыы, түргэнник буорту буолар аһылыгы уһун кэмҥэ сөптөөх усулуобуйаҕа харайыы. Маны сэргэ, Ил Дархан дьаһалынан Эргиэн-логистика киинигэр олохтоох оҥорон таһаарааччылар бородууксуйаларын атыылаһан ылыахтаахтар. Ол курдук, Дьокуускайга кэнсиэрбэ сыаҕар ыытан астататарга нэһилиэнньэттэн сир аһын, балыгы уонна эти тутуохтаахтар. Өссө бу Киин нөҥүө дьиэ тутар уонна өрөмүөннүүр матырыйаал атыылаһыан баҕалаахтар элбэхтэр эбит. Маны таһынан, саҥа эбийиэккэ элбэх киһи үлэнэн хааччыллыбыт, үлэһиттэр усулуобуйалара тупсубут.
“Эргиэн-логистика киинэ” АУо генеральнай дириэктэрэ Сайдам Степанов саҥа Киин үлэҕэ киирбитин кэнниттэн Хонууга атыыланар табаар көрүҥэ 300-тэн 950 диэри элбээбитин бэлиэтээтэ. Ол иһигэр олохтоох оҥорон таһаарааччылар: Дьокуускайдааҕы көтөр фабрикатын, килиэп кэмбинээтин, «Якутия» ФАПК, «Саюри» фирма, «Вим Групп» бытовой химияны оҥорооччулар, Булуҥ табатын этэ, «Чурапчы» ТХПК ынаҕын арыыта, «Лидер»ХЭТ «Буум» гаастаах утаҕа, «Чоккай Ас» кэнсиэрбэлэрэ уонна да атыттар.
Хонуутааҕы киин уопсай иэнэ – 530 кв.м. Манна атыылыыр саала, оҕуруот аһын харайар сир, тымнытар хаамыралар уонна сылаас ыскылаат киирэллэр. Өссө 188 кв.м. иэннээх тымныы ыскылаат тутуллубута. Оҕуруот аһын аныгы тэрил көмөтүнэн өрүү биир сөптөөх температураҕа уонна сииктээх салгыҥҥа туталлар. Быйыл маннык кииннэр Эбээн Бытантай, Аллайыаха уонна Өлөөн улуустарыгар арыллан үлэлэрин саҕалыахтара. Ол түмүгэр Аартыка 13 улууһа тыын суолталаах табаарынан хааччыллыахтара.
Хаартыскалар: СӨ Бырабыыталыстыбатын уонна Ил Дарханын пресс-сулууспата
-
0
-
0
-
0
-
0
-
0
-
0
