Саахал түмүгэр суудуна уҥа өттө алдьанан, 182 туонна Аи-92 бензин өрүскэ тохтор кутталламмыта. Тэстибит цистернаттан өрүскэ уматык уу курдук дохсуннук сүүрэн барбыта, төһө кээмэйдээх экологическай алдьархай тахсыбыта билиҥҥитэ чуолкайдана илик. Иркутскай уобалас Киренскай оройуонугар ыксаллаах быһыы-майгы биллэрилиннэ.
Хапытаан итирдэр утаҕы испит
«Илин Сибиирдээҕи тырааныспар борокуруора Денис Авдеев иһитиннэрбитинэн, «Ерофей Хабаров» суудунаны хапытаан көмөлөһөөччүтэ ыытан испит. Медицинскэй чинчийии көрдөрбүтүнэн, хапытаан итирдэр утаҕы испитэ биллибит. Итинтэн сылтаан улахан алдьархай таҕыста, ону юристар сыаналыахтарын наада», — диэн Игорь Кобзев, Иркутскай уобалас губернатора бэйэтин телеграм-ханаалыгар суруйбутун тарҕаппыттар. Кини холуобунай дьыала көбүтүллүбүтүн туһунан эбэн эппит.
Уматык ньамаҕа билигин сүүрүк хоту Саха Сиригэр устан иһэр, күннэтэ исписэлиистэр ууну кэтээн көрөллөр.
Быыһааччылар бэлэмнэр
Ил Дархан Айсен Николаев сорудаҕынан оробуочай бөлөх тэриллэн, Ленскэй, Өлүөхүмэ улууһугар бардылар. СӨ бырабыыталыстыбатын бэрэссэдээтэлин бастакы солбуйааччыта Дмитрий Садовников иһитиннэрбитинэн, экипаж түргэнник миэрэ ылан, улахан хоромньу тахсыбатын туһугар тэстибит цистернаттан бензини атын иһиккэ куппуттар, ньиэби тиэйэр суудуна алдьаммыт сирин оҥорбуттар. Тулалыыр эйгэҕэ тахсар буортулаах дьайыыны кыччатарга 300 кг. сорбент куппуттар. Саахалы туоратарга икки буксир, биир танкер көмөлөспүттэр.
Бензин тиэйэн иһэн саахалга түбэспит теплоход Пеледуйга тиийэн ГСМ сүөкээтэҕинэ биирдэ төһө кээмэйдээх уматык Өлүөнэ өрүскэ тохтубута чуолкайданыахтаах.
Дмитрий Садовников Өлүөнэ өрүскэ ньиэп тохтубутун быыстала суох кэтииллэрин, СӨ быыһыыр сулууспата уматык тохтубутун туоратарга анал сириэстибэлээх Ленскэйгэ бэлэм олорорун туһунан эппитэ. Кинилэр икки устар суудуналаахтар, 350 кг. сорбеннаахтар, 300 м. боновай күрүөлээхтэр.
Ньиэп ньамаҕа 3-4 суукканан кэлиэҕэ
Дьокуускайдааҕы гидрометсулууспа сэрэппитинэн, уматык ньамаҕа өрөспүүбүлүкэҕэ 3-4 суукканан кэлиэхтээх.
«Саха Сирин айылҕатыгар бачча кээмэйдээх хоромньу таҕыста диэн этэр билиҥҥитэ эрдэ. СӨ экологияҕа министиэристибэтэ Өлүөнэ өрүскэ уу туругун Ленскэй, Өлүөхүмэ, Хаҥалас улуустарыгар кэтээн көрөр. Сууккаҕа иккитэ уу боруобатын ылаллар», — диэн вице-премьер эттэ.
Өскөтүн уу боруобатыгар ньиэп бородууктата нуорманы куоһардаҕына СӨ Росприроднадзор управлениетыгар биллэриэхтэрэ. Өлүөнэ өрүс федеральнай судаарыстыбаннай экологическай мониторинг бас билиитигэр киирэр. Дьокуускайдааҕы айылҕаны харыстыыр борокуратура кэтиир уорганнартан ирдэһэ олорор.
Тыын харбыалаһан
Социальнай ситимнэргэ уунан төһө кыалларынан хаһааныҥ диэн сэрэтэллэр даҕаны, хас буочука тиийиэй? Аҕыйах сыллааҕыта «АЛРОСА» хампаанньа Бүлүү өрүһү сүһүрдэн, күөҕүнэн чэлгийэ сыппыт уу начаас будулуйа түспүтэ, хойутаан да буоллар, ууну ыраастыыр ыстаансыйа тутан биэрбиттэрэ.
182 туонна бензин цистерната тэстэн, Өлүөнэ өрүскэ төһөтө түспүтэ тугунан эргийэн тахсыа биллибэт. Ол иһин өрүстэн буолбакка, сир анныттан ууну ылар альернативнай ситим тиһилигин сайыннарыахха баара. Экологическай алдьархай таҕыстаҕына туох да бэлэмэ суох олорон биэрбэт, бүтэһик тыын харбыалаһан, иһит-хомуос аайы уу хаһааммат туһугар.
Интэриниэт ситимин хаартыскалара
-
0
-
0
-
0
-
0
-
0
-
0
