Былырыын, 2023 сылга Ленскэй куорат аннынан муус хамсааһына ыам ыйын 13 күнүгэр бэлиэтэммит. Дьокуускай аннынан муус хойуутук устуута ыам ыйын 17 күнүгэр саҕаламмыт. Ону тэҥэ, 2023 сылга халаан уута тахсыытынан уонна ити кэмҥэ үгүс ардах, хаар түһүүтүнэн Амма, Чурапчы, Уус Алдан, Таатта уонна Куорунай, Кэбээйи, Анаабыр улуустарыгар ЫБМ биллэриллибитэ.
Быйыл Саха Сирин өрүстэрин эстиилэрэ уһун кэмнээх кэтээн көрүү орто болдьоҕор сөп түбэһэрэ сабаҕаланар (нуорматтан эрдэлиирэ 1-3 хонук араастаһыылаах).
Алдан, Бүлүү өрүстэрэ уонна Амма өрүс аллараа сүүрүгэр ыам ыйын иккис дэкээдэтигэр эстэллэрэ күүтүллэр (1-3 хонук эрдэлээн). Хоту, хотугулуу-илин өрүстэр эстиилэрэ ыам ыйын 3 дэкээдэтигэр, бэс ыйын саҥатыгар, Халыма өрүс Зырянка аннынан ыам ыйын иккис дэкээдэтин бүтүүтүгэр бэлиэтэниэҕэ.
Быйыл халаан уута Өлүөнэ өрүс Ленскэй таһынан, Алдан, Дьааҥы, Индигиир өрүстэр бастарыгар орто көрдөрүүттэн 03-1,2 м. намыһах буолуоҕа диэн сабаҕалыыллар. Халымаҕа Зырянка аннынан кутталлаах бэлиэҕэ чугаһыаҕа диэн сэрэппиттэр.
Харыылар тахсыылара муус барыытын кэмигэр чопчу гидрометорологическай усулуобуйалар үөскээһиннэриттэн тутулуктаах диэн бэлиэтээбиттэр. Муус устуутун кэмигэр 200 гидрологическай пост кэтээн көрүүнү ыытыахтара. Нэһилиэнньэни эвакуациялыырга 267 кылгас кэмҥэ олохсутар пууну (23,2 тыһ. миэстэҕэ), ынах сүөһүнү, сылгыны көһөрөргө аналлаах миэстэлэри бэлэмнииргэ былаан оҥоһуллубут. Ону тэҥэ, салгынынан кэтээн көрүү ыытыллыаҕа, онуоха бэйэтэ көтөр тэриллэр, РФ ЫБММ биир уонна гражданскай авиация 14 салгын суудуналара бэлэмҥэ тураллар. Бу сылга РФ ЫБММ СӨ управлениетыгар саҥа бэйэтэ көтөр авиация комплекса ылыныллыбыта.
Халаан кэмигэр СӨ Быыһыыр сулууспатын уонна РФ ЫБММ СӨ управлениетын быыһааччылара, исписэлиистэрэ күүһүрдүллүбүт эрэсииминэн, хас да бөлөҕунэн араарыллан үлэлиэхтэрэ. Өрөспүүбүлүкэ үрдүнэн, уопсайа 16 тыһ. киһи, 3 тыһ. тиэхиньикэ, 557 устар тэрил, 25 көтөр аал халаан уутун куттала суох ыытарга, быыһыыр үлэлэри ыытарга кытталлара былааннаммыт. Бу иннинэ, санатан эттэххэ, СӨ Ил Дархана Айсен Николаев бары нэһилиэнньэлээх пууннары халаан уутуттан уонна ойуур баһаардарыттан харыстыырга, бэлэм буолалларыгар сорудахтаабыта.
-
0
-
0
-
0
-
0
-
0
-
0
