СӨ Экологияҕа, айылҕаны туһаныыга уонна ойуур хаһаайыстыбатын миниистирин солбуйааччы Андрей Коноплев брифиҥҥэ иһитиннэрбитинэн, ойаар баһаара Дьааҥы, Таатта, Уус Алдан, Эбээн-Бытантай улуустарыгар, ону тэҥэ «Дьокуускай куорат» куораттааҕы уокурукка бэлиэтэммит.
Уот умулларааччылар күүстэринэн 3 ойуур баһаарын уонна 1 ландшафтнай баһаар тохтотуллубут. Бүгүн сарсыарда 2 ойуур баһаара бэлиэтэнэр: Эбээн-Бытантайга уонна ландшафтнай «Дьокуускай куорат» куораттааҕы уокурукка. Коноплев этэринэн, икки баһаар уустук суоллаах, ыраах сытар сирдэргэ бааллар.
Баһаартан сэрэхтээх буолуу сезона саҕаланыаҕыттан Саха Сирин сиригэр-уотугар 81 ойуур баһаара тахсыбыта бэлиэтэннэ.
«Ойуур уонна ландшафтнай ойуур баһаарын сүрүн биричиинэтинэн киһи буолар. Айылҕаҕа тахсыыга сэрэхтээх буолуҥ. Сезон саҕаланыаҕыттан ойуур баһаарыгар номнуо 32 киһи буруйданна. 70 боротокуол оҥоһулунна», — диэтэ иниспиэктэр. Сезон саҕаланыаҕыттан барыта 248 айылҕа ойуур баһаара умуруоруллубут.
Бүгүн зондировщик сөмөлүөт Амма, Уус Маайа, Чурапчы улуустарыгар көтөр. Санатар буоллахха, баһаар кутталын кылааһын намтатар соруктаах Өлүөхүмэ, Үөһээ Бүлүү, Бүлүү, Горнай, Кэбээйи, Хаҥалас уонна Нам улуустарын сирдэригэр “Метео” Як-40 сөмөлүөт көтүү оҥорбутун туһунан суһал ыстаап иһитиннэрбитэ.
Оттон ааспыт нэдиэлэ бүтүүтэ космическай уонна авиационнай кэтээн көрүү түмүгэр Абый, Кэбээйи, Хаҥалас улуустарыгар уонна Дьокуускай куоракка 28 га иэннээх 4 айылҕа баһаарын булбуттара.
Хаартыска Сахагов
-
0
-
0
-
0
-
0
-
0
-
0
