От ыйын 16 күнүгэр СӨ Бырабыыталыстыбатын Бэрэссэдээтэлин бастакы солбуйааччы Дмитрий Садовников салалтатынан ыытыллыбыт оперативнай ыстаап суһал мунньаҕар сайыҥҥы халаан уутун аһардыыга быыһыыр, чөлүгэр түһэрэр үлэлэри ыытыы боппуруоһа көрүлүннэ.
От ыйын 17 күнүнээҕи туругунан, Индигиир өрүс үөһээ сүүрүгэр,Уус Ньараҕа уу таһыма лаппа намтаата, Өймөкөөҥҥө, Томторго уу таһыма түһэр. Бүгүн Өймөкөөн улууһугар СӨ Бырабыыталыстыбатын анал бөлөҕө тиийиэҕэ, ону кытта бөртөлүөтүнэн гуманитарнай көмөнү тиэрдиэҕэ. Бөлөҕү Дмитрий Садовников бэйэтэ салайар. Нэһилиэнньэҕэ анаан Дьокуускайдааҕы килиэп собуотун бородууксуйата тиэрдиллиэҕэ. Анал бөлөх чөлүгэр түһэрии үлэтин уонна нэһилиэнньэҕэ аадырыстаммыт көмөнү оҥорууну сүрүннүүр, ону кытта төһө, хайдах хоромньу тахсыбытын сыаналыыр. СӨ кырасдааныскай көмүскэл уонна нэһилиэнньэ олоҕор-дьаһаҕар куттал суох буолуутун хааччыйыыга миниистирэ Дмитрий Лепчиков иһитиннэрэринэн, миэстэтигэр Арассыыйа ЫБММ СӨ Кылаабынай управлениетын оперативнай бөлөҕө уонна өрөспүүбүлүкэтээҕи быыһыыр сулууспа быыһааччылара үлэлэрин салгыыллар. Индигиир быһа охсон ааһар улуустарыгар – Өймөкөөҥҥө, Муомаҕа, Абыйга 3 бөртөлүөт тиийдэ, анал тэрилтэлэр исписэлиистэрэ үлэлииллэр, 3,3 туонна таһаҕас (мотопомпалар, балааккалар, оһохтор, уматык уо.д.а) тиэрдилиннэ.
Индигиир өрүскэ уу таһыма 2-10 см түспүтэ бэлиэтэнэр. Ол туһунан СӨ кырасдааныскай көмүскэл уонна нэһилиэнньэ олоҕор-дьаһаҕар куттал суох буолуутун хааччыйыыга миниистирин бастакы солбуйааччы Айаал Вензель от ыйын 17 күнүгэр иһитиннэрдэ.
Сарсыарда 8 чаастааҕы туругунан, Өймөкөөн сэлиэнньэтин аттыгар уу таһыма 578 см тиийбит, ааспыт 4 чаас иһигэр 2 см түһүү бэлиэтэннэ. Аллараа өттүгэр, Юрта гидропуоска уу таһыма 887 см тиийдэ (4 чаас иһигэр 23 см үрдээһин, кутталлаах таһыма 1089 см). Уус-Ньара бөһүөлэгэр таһыма 535 см, 4 чаас иһигэр 9 см түһүү. Хонуу сэлиэнньэтин аттыгар уу таһыма 637 см, 10 см түһүү. Ньара үрэххэ Ала-Чубук гидропуоһугар – 635 см (9 см түһүү).
Айаал Вензель Өймөкөөҥҥө 347 тиэргэн ууга барбытын, ол иһигэр 93 олорор дьиэ, онно 1527 киһи, ол иһигэр 405 оҕо олорорун бэлиэтээтэ.. Муома улууһугар 28 тиэргэн ууга барбыт, онно 30 киһи олорор. Абый улууһугар Кэбэргэнэ сэлиэнньэтигэр 7 тиэргэн ууга барбыт.
Ааспыт сууккаҕа Өймөкөөн оройуонугар матырыйаал саппааһын тиэрдиигэ үлэ ыытылынна. Маны тэҥэ Дьааҥытааҕы этэрээттэн 5 быыһааччы Хонуу нэһилиэгэр көһөрүллүбүтэ. Суһал бөлөх уонна Быыһыыр сулууспа быыһааччылара үлэлииллэр диэн Айаал Вензель билиһиннэрдэ
Халаан уутун тахсыытынан 3 улууска уопсайа 668 киһи нус-хас олоҕо уйгуурдуллубута бэлиэтэнэр, 160 олохтоох эвакуацияланна (үгүстэр дьиэлэригэр хаалалларын ордордулар). Уопсайынан кыраасданнарга анаан 9 кылгас кэмҥэ олохсутар пуун тэрилиннэ: Өймөкөөн улууһугар - 7 (33 киһи, 52 киһи аймахтарынан), Абыйга -2. Ынах сүөһү, сылгы куттала суох үрдүк сирдэргэ кэмигэр көһөрүлүннүлэр.
Дмитрий Садовников бэлиэтээбитинэн, Саха Өрөспүүбүлүкэтин Ил Дарханын Айсен Николаев бүгүҥҥү сорудаҕынан алдьатыылаах халаан уутун аһардан, уу таһыма намтаата да тутуспутунан халаантан тахсыбыт хоромньуну туоратыыга, чөлүгэр түһэрии үлэлэрин саҕалыахтара.
Хаартыска Саха гов
-
0
-
0
-
0
-
0
-
0
-
0
