Бырагырааманы олоххо туһаныы саҕаланна. Маннык хабааннаах чинчийиинэн сөптөөх түмүгү 20 сөкүүндэттэн 1 мүнүүтэҕэ диэри кэмҥэ ылаллар. Бу ньыманы туһанан коронавирус дьаҥа баарын-суоҕун быһаарбыттарын туһунан СӨ Инновацияҕа, сыыппараны сайыннарыыга министиэристибэтин пресс-сулууспата иһитиннэрэр.
Муус устар 27 күнүгэр Дьокуускайдааҕы 3 №-дээх балыыһаҕа "SCIBERIA" хампаанньа коронавирус дьаҥын быһаарар систиэмэтин таҥан туруорбуттара. Бу систиэмэни оҥорооччулар чинчийэр саҥа бырагыраама коронавирус дьаҥын 95 % быһаарарын туһунан этэллэр. «Ыам ыйын 7-15 күннэригэр 8-тан 89-гар диэри саастаах 81 киһини ити саҥа систиэмэ көмөтүнэн көрдүбүт. Компьютернай томографияҕа уонна саҥа систиэмэ көмөтүнэн 61 түһэриигэ коронавирус дьаҥа баара быһаарыллыбыта. Саҥа систиэмэ көмөтүнэн быраастар сөптөөх диагноһы туруорар кыахтаахтар», - диэн "SCIBERIA" хампаанньа генеральнай дириэктэрэ Игорь Саввин кэпсиир. Санатар буоллахха, соторутааҕыта "SCIBERIA" хампаанньа уонна Дьокуускайдааҕы 3 №-дээх балыыһа салалталара саҥа систиэмэни бэрэбиэркэлииргэ бииргэ үлэлииргэ Сөбүлэһии түһэрсибиттэрэ.
-
0
-
0
-
0
-
0
-
0
-
0
