РФ Бырабыыталыстыбатын бэрэссэдээтэлин солбуйааччы Татьяна Голикова биир нэдиэлэлээх харантыыны биллэрэр туһунан этиитин Бэрэсидьиэн Владимир Путин өйөөтө. Онон Арассыыйаҕа алтынньы 30 күнүттэн сэтинньи сэттистииригэр диэри үлэ тохтотуллар, бука бары дьиэҕэ хам бааччы олоробут.
“Эрэгийиэннэр бэйэҕит балаһыанньаҕытыттан көрөн, болдьоҕун быһаарыҥ. Ыарыы элбэх буоллаҕына, алтынньы 23 күнүттэн да барыаххытын сөп”, -- диэтэ дойду аҕа баһылыга.
Кини быһыыны ылыы бытаанын бэлиэтиир. РФ Доруобуйаҕа харыстабылын миниистирэ Михаил Мурашко: “Быһыыны толору ылбыт киһи ахсаана -- 47 мөл. тахса. Оттон биир компоненнаах “Спутник-Лайт” диэни балтараа мөлүйүөн киһи ылла. Ол аата нэһилиэнньэ улахан дьонун 45 % -на эрэ вакцинацияламмыт. Бырабыыталыстыба Бэрэссэдээтэлэ Михаил Мишустин былааны 80%-ҥа диэри үрдэппитэ. Маннык тэтиминэн ону ситиһэрбит ыраах. Быһыыны ылыыга бастыҥ көрдөрүүлээхтэринэн Брянскай, Курскай, Пензенскэй уобаластар, Чукотка уонна Санкт-Петербург буолаллар. Икки ыйга тиийэр доза баар. Онон бу өрөбүллэргэ иллэҥсийбиччэ, итиэннэ бэйэҕит доруобуйаҕыт туһугар, баһаалыста, быһыыта туруортарыҥ”, -- диэн эттэ.
Саха сиригэр билиҥҥи туругунан 363 тыһ. киһи вакцинацияламмыт. “Бу көрдөрүү намыһах”, -- диир Ил Дархан Айсен Николаев. Оттон сутуллубут дьоммут ахсаана күн-түүн эбиллэ турар. Өлүүбүт да элбэх. “Стопкоронавирус.рф” саайтка киирэн көрдөххө, өрөспүүбүлүкэбитигэр ковидтан сууккаҕа 7-12 киһи күн аайы тыына быстар эбит. Онон дьаҥ утары тэрээһиннэри саҥалыы киэбинэн ыытар кэм уолдьаста. Ол иһин да буолуо, СӨ Доруобуйаҕа харыстабылын миниистирэ Елена Борисова баҕа өттүнэн уурайда, эбээһинэһи толорооччунан онкодиспансер кылаабынай бырааһа Лена Афанасьева ананна.
Төрдүс долгун, кырдьыга да, бу иннинээҕилэртэн быдан уодаһыннаах. Ол иһин мантан ыла тыйаатырга, мусуойдарга, киинэҕэ, рестораҥҥа, кафеҕа, фитнес-кулуупка, о.д.а. уопсастыбаннай сирдэргэ вакцинаны ылбыккын туоһулуур QR-кодкун көрдөрүөхтээххин. Онто суох киллэрбэттэр. Саха сиригэр эрэ маннык дьаһал тахсыбыт дии санаамаҥ, эрэгийиэн ахсын киирэн эрэр, сорохторго сайыҥҥыттан баар. Итинник күһэйдэххэ эрэ, баҕар, хамсааһын тахсыа.
“Бу икки нэдиэлэлээх тохтобул 60 млрд. солк хоромньуну урбаанньыттарга оҥоруон сөп”, -- диэн аахпыт РФ премьерин бастакы солбуйааччы Андрей Белоусов. Онуоха Владимир Путин: “Иллэрээ сыллааҕы локдаун кэмигэр дьаһаммыппыт курдук, өйүүр миэрэлэри ыларга Бырабыыталыстыбаҕа сорудахтыам. Оттон бүддьүөт үлэһиттэригэр хамнастарын толору биэриэхпит”,-- диэн хардарда.
Онон үрдүкү салалтабыт нэһилиэнньэ доруобуйатын туһугар ити курдук кыһалларын өйдөөн уонна өйөөн, бу биллэрбит “КОВИкул” кэмигэр хааччахтааһыны тутуһуҥ, дьиэҕитигэр олоруҥ. COVID-19 киһи оонньуур дьаҥа буолбатах.
-
0
-
0
-
0
-
0
-
0
-
0
