Бүгүн ахсынньы ый 19 күнүгэр Өрөспүүбүлүкэбит Ил Дархана Айсен Николаев, саҥа Өрөспүүбүлүкэтээҕи Кардиологическай диспансер тутуутун үлэтин кытары билистэ.
Өрөспүүбүлүкэтээҕи кардиологическай диспансер, биһиги өрөспүүбүлүкэбитигэр социальнай хайысхалаах тутууларга биир улахан объекпыт буолар. Бу объект Уһук Илин биир кэлим субсидиятынан үбүлэнэн тутулла турар. Диспансер тутуутун туһунан быһаарыныыны 2019 сыллаахха РФ Бэрэсэдьиэнин Уһук Илин уокуругар боломуочуйалааах бэрэстэбиитэлэ Юрий Трутнев ылыммыта. Ити сылтан тутуу үлэтин саҕалаабытынан барбыппыт. Бүгүҥҥү күҥҥэ объекпыт тутуутун үлэтэ бүттэ. Билигин оборудованиелары туруоруу, холбооһун уонна “ыраас” хостор истэрин бэлэмнээһин, ситэрээһин үлэтэ барар турар - диэн, Айсен Сергеевич кэпсээтэ.
Судаарыстыбаннай сакаастыыр Сулууспа сүрүн дириэктэрэ Пётр Кукширин кэпсээбитинэн, билигин диспансер иһинээҕи вентиляцияны бүрүйүү, таҥааһын уонна улахан МРТ, КТ оборудованиеларын киллэрии-көннөрүү үлэтэ барар турар эбит. Диспансер тутуутун уопсай үлэтэ 92%-на туолбут. Петр Иванович, билигин былассааккаҕа барыта 140 киһи үлэлии сылдьарын туһунан эбии иһитиннэрбит.
Өрөспүүбүлүкэбит Аҕа баһылыга үлэни ыйыллыбыт кэмигэр бүтэрэн, туһааннаах докумуоннары ситэрэн, объегы туттарарга бэлэм буолалларыгар сорудахтаата. Өрөспүүбүлүкэтээҕи кардиологическай диспансер 2022 сыл муус устар ыйыттан дьону көрөн саҕалыахтаах.
Кардиологическай диспансер үлэҕэ киириитэ – бу эбии биир медицинскэй тэрилтэ тутуллуута буолбакка, өрөспүүбүлүкэбитигэр кардиологическай сулууспа саҥалыы сайдыытын үктэлэ буолар. Аныгы, сайдыылаах эмтиир кииннэр таһымнарыгар туттуллар оборудованиебыт көмөтүнэн, сүрэх ыарыытын эмтээһинин, хаачыстыбатын, эрдэ-сылла ыарыһахтар диагностарын туруорууну уонна уустук эппирээссийэлэр таһымнарын үрдэтиини, ыарыһахтар салгыы эмтэнэллэрин сөптөөхтүк салайыыны ситиһии буолар. Биһиги, Сахабыт Сирин быраастара итиннэ профессиональнай өттүнэн бары ирдэбиллэргэ эппиэттииллэр – диэн, Айсен Николаев санаатын үллэһиннэ.
“Саха Сирин быраастарын бэлэмнэрин таһыма, сүрэх хайа баҕарар эппирээссийэтин оҥорор кыахтаахтарын көрдөрөр. Саҥа Кардиоцентр үлэҕэ киирдэҕинэ, дьоммут өрөспүүбүлүкэ таһыгар тахсаллара наадата суох буолар”, - диэн, СӨ Бырабыыталыстыбатын пресс-киинэ иһитиннэрэр.
Андрей Сорокин хаартыскалара.
- 0
- 0
- 0
- 0
- 0
- 0