«Эбии миэрэ бакыаттарын оҥорууга, олоххо киллэриигэ үлэ барар. Ол иһигэр чэпчэтиилээх ипотека бырагыраамаларын уһатыыга. Билиҥҥи туругунан 2022 сыл кулун тутар ый бүтүөр диэри инники ылыллыбыт быраабылалар туһаныллаллар», — диэн РФ тутууга уонна ОДьКХ миниистирэ Ирек Файзуллин эттэ.
Санатар буоллахха, чэпчэтиилээх ипотека бырагыраамата 2020 сыл муус устарыгар, пандемия кэмигэр нэһилиэнньэни уонна тутуу салаатын өйүүр сыалтан, дойду Бэрэсидьиэнэ Владимир Путин этиитинэн киирбитэ.
Таһаарыылаахтык үлэлээн, аҕыйах ый иһигэр көрдөрүүлэр биллэ улааппыттара. Ол курдук, 2020 сыл түмүгүнэн саҥа туттуллар дьиэлэргэ 1 трлн солк. кэриҥэ суумалаах чэпчэтиилээх ипотека бэриллибитэ.
Хара маҥнайгыттан дьиэни атыылаһыыга кирэдьиит федеральнай бүддьүөттэн 6,5%-ҥа диэри субсидияланара. Маныаха кирэдьиит биэрэр бааннар эбии чэпчэтиилэри көрөллөрө.
2021 сыл от ыйыгар бырагыраама 2022 сыл ортотугар диэри уһатыллара биллибитэ. Маныаха судаарыстыбаттан субсидия 7% үрдүгэ суох уонна суумата 6-12 мөл. солк. диэри, РФ субъекатырыгар 3 мөл. солк. диэри бэриллэрэ. Былырыын алтынньыга РФ Бырабыыталыстыбата бу бырагыраама усулуобуйаларын кэтэх дьиэлэри тутууга эмиэ тарҕаппыта.
Дьиэ кэргэн ипотекатыгар судаарыстыбаннай бырагыраама дойду Бэрэсидьиэнин дьаһалынан 2018 сыл тохсунньу 1 күнүттэн саҕаламмыта уонна судаарыстыбаттан кирэдьииттээһиҥҥэ субсидия көрөрү сабаҕалыыра. 2021 сыл от ыйын 2 күнүттэн бырагыраама икки эрэ оҕолоох дьиэ кэргэннэргэ буолбакка, биир оҕолоохтору эмиэ хабар буолбута. Маныаха кырачаан 2018 сыл тохсунньу 1 күнүттэн 2022 сыл ахсынньы 31 күнүгэр диэри күн сирин көрбүт буолуохтаах диэн усулуобуйа турбута. Муҥутуур кирэдьиит суумата Москуба, Санкт Петербург, Москуба уонна Ленинград уобаластарыгар 12 мөл. солкуобайга диэри, оттон атын субъектарга 6 мөл. солк диэри.
Уһук Илин ипотекатын судаарыстыбаннай бырагыраамата 2019 сылтан ыччаты эрэгийиэҥҥэ тардар сыаллаах саҕаламмыта. Ол курдук, манна ыччат уонна квалификациялаах каадырдар тиийбэттэрэ бэлиэтэнэрэ.
Эдэр дьиэ кэргэннэргэ уонна Уһук Илин гектар кыттыылаахтарыгар бырагыраама чэрчитинэн 6 мөл. солкуобайга диэри 2% чэпчэтиилээх ыстаапканан 20 сылга диэри Уһук Илин федеральнай уокурукка тутулла турар дьиэни атыылаһыыга кэҥэтиллибитэ.
Араас ааҕыынан бырагыраама өҥөтүнэн, Уһук Илин ипотеканан туһанан, уокурукка нэһилиэнньэ ахсаана 6,16 мөл. 8,18 киһиэхэ диэри элбээбит.
-
0
-
0
-
0
-
0
-
0
-
0
