Быһа холоон үлэ ырыынагар быйыл Арассыыйа үрдүк үөрэҕин кыһаларын 410 тыһыынча исписэлиис бүтэриэҕэ диэн РФ Үөрэҕирии министиэристибэтин саайтыгар биллэрилиннэ. Биэдэмистибэ баһылыга Валерий Фальков кэпсииринэн, ордук бакалавриат уонна специалитет выпускниктара үлэтэ суох хаалар кутталлаахтар.
Миниистр бэлиэтээбитинэн, бакалавриаты уонна специалитеты 267 тыһ. оҕо түмүктүүр, аны туран магистраннартан ураты бу саҥа эдэр исписэлиистэр үлэ миэстэтин булалларыгар ордук ыарахаттары көрсөллөр.
«Медицинскэй, педагогическай, сыыппара технологияларын үөрэх хайысхаларын бүтэрээччилэригэр үгэс курдук тэрилтэлэринэн үлэһиккэ наадыйыы үрдүк буолар. Быйыл үрдүк үөрэх кыһатын бу идэлэргэ исписэлиистэр бэлэмнэнэн тахсыылара 110 тыһ. тахса ахсааҥҥа тиийиэҕэ. 40 тыһ. тахса тус сыаллаах дуогабарынан, анал миэстэ усулуобуйатыгар үөрэххэ киирбит выпускниктар үлэ миэстэлэринэн хааччыллыылаахтар. Атыттар үлэ көрдүүллэригэр балаһыанньа уустугуруон сөп", - диэн бэлиэтиир Валерий Фальков.
Биэдэмистибэ баһылыга этэринэн, устудьуоннары үлэнэн хааччыйыыга үрдүк үөрэх кыһалара регионнааҕы былаастары кытта бииргэ үлэлээһиннэрэ көмөлөһүөҕэ. Билигин маннык быраактыка олоххо баар. Холобур, университет базатыгар анал отделениелар үлэлииллэр - Карьера оҥоруу уонна үлэнэн хааччыйыы кииннэрэ. Билигин маннык кииннэр ахсааннара 207, кинилэр сыаллара – үлэ ырыынагар выпускниктар умсугутууларын үрдэтии уонна үлэ көрдүүллэригэр көмө оҥоруу буолар.
Билигин үлэ ырыынагар балаһыанньа уустугурбутунан Карьера оҥоруу уонна үлэнэн хааччыйыы кииннэригэр наадыйыы уонна болҕомто үрдээтэ.
Ону сэргэ, Валерий Фальков быйылгы дьыл үрдүк үөрэх выпускниктарын наукаҕа сыһыаннаах араас тэрилтэлэргэ, инженердэр уонна лабораннар дуоһунастарыгар сыһыарар сыалтан анал дьаһаллары ылынан олоххо киллэрэргэ этии киллэрдэ: «Үрдүк үөрэх кыһатын бүтэрээччилэри наука эйгэтин идэлэригэр үлэҕэ ылыыларыгар наукаҕа сыһыаннаах уонна научнай үөрэх тэрилтэлэрин ороскуоттарын толуйан субсидия көрүөххэ наада. Ону таһынан, үлэни булар кыаҕы үрдэтиини үөрэх араас таһымнаах выпускниктара бары бииргэ туһаныахтаахтар».
«Үлэни булбут бакалавриат выпускниктара чинчийээччи балаһыанньатын тутуһуохтаахтар. Ол түмүгэр магистратураҕа ханнык хайысханан уонна ханнык бырагырааманан талан ылан салгыы үөрэнэргэ кыаҕы үрдэтэрин миниистир тоһоҕолуур. Оттон магистратура выпускниктара науканы кытта үлэни ситимнээн аспирантураҕа научнай сотрудник ыстаапкатыгар үлэни салгыырга кыахтарын үрдэтэр. Бу тэрээһиннэри олоххо киллэрэн 10 тыһыынчаттан итэҕэһэ суох выпускниктары чинчийии уонна бэлэмнээһин эйгэтигэр эбии киллэриини хааччыйыан сөп, регионнааҕы үрдүк үөрэх кыһатыгар уонна научнай тэрилтэлэргэ күүс-көмө биэриэҕэ, дойду национальнай сайдыытыгар, ол иһигэр «Наука»национальнай бырайыак сыалларын ситиһэргэ эбии ньыманан буолуоҕа», - диэн кэпсээтэ миниистир.
-
0
-
0
-
0
-
0
-
0
-
0
