Бырайыак Уһук Илин уокурук куораттарын сайыннарыыларын туһунан Владимир Путин сорудаҕынан олоххо киллэриллэр. Дьокуускай куорат уонна кини тулата кэлимник сайдыытын уһун болдьохтоох былаана 33 тэрээһиннээх. Манна хомунаалынай, социальнай, тырааныспар уонна бырамыысыланнас эйгэлэрин сайыннарыыга барыта 448,8 млрд солк. көрүллүбүтэ. Былаан быһыытынан М.К. Аммосов аатынан ХИФУ мединститутун виварийдаах лабораторнай куорпуһа, элбэх функциялаах орто профессиональнай үөрэхтээһин кыһатын тиһигэ, кэлэр көлүөнэлэр паарката, аан дойдутааҕы сэлии киинэ, муусука үрдүкү оскуолатын куорпуһа, о.д.а.
Ил Түмэн спикерэ Алексей Еремеев этэринэн, саҥа эбийиэктэри тутуу, аныгы оборудованиены киллэрии Саха Сирин олохтоохторун олохторун хаачыстыбатын тупсарыыга, элбэх хайысхалаах эйгэни сайыннарыыга кыахтары биэрэр.
- Дьокуускай уонна Нерюнгри куораттара Уһук Илин уокурук экэниэмикэтин уонна социальнай эйгэтин кэскиллээх салааларыгар «үүнүү туочукалара» буолуохтара, - диир Алексей Еремеев.
Нерюнгри куорат уонна кини оройуонун кэлимник сайдыытын уһун болдьохтоох былаанын 19 тэрээһинигэр 113,5 млрд солк. көрүллэр. Былааны олоххо киллэрии оройуон бырамыысыланнай кыаҕын үрдэтиигэ, көмүһү хостооһун көрдөрүүтүн улаатыннарыыга, ойуур бырамыысыланнаһын оҥоруутун суотугар экэниэмикэни сайыннарыыга, Нерюнгри оройуонугар нэһилиэнньэ олохсуйарыгар табыгастаах эйгэни тэрийэргэ көмөлөһүөҕэ.
Норуот дьокутаата Александр Кошуков бэлиэтииринэн, Нерюнгрига доруобуйа харыстабылын сайдыытын стратегиятынан уонна СӨ Ил Дархана Айсен Николаев «Нерюнгри оройуонун 2026 сылга диэри сайыннарыытын туһунан» Ыйааҕынан доруобуйа харыстабылын түөрт эбийиэгэ саҥардыллар.
- Билигин Нерюнгритааҕы киин балыыһа тиһигин "А" уонна "Б" блоктарын реконструкциялааһын ыытыллар. Тирии-венерологическай диспансера, улахан поликлиника, акушерскай отделение, суһал мэдиссиинэ көмөтүн сулууспата, о.д.а. эбийиэктэр хапытаалынай өрөмүөннэрэ былааннанар. Ити барыта мэдиссиинэ өҥөлөрүн биллэрдик кэҥэтиигэ, хаачыстыбалаах уонна табыгастаах буолууларын үрдэтиигэ тиэрдэр, – диэн парламентарий чопчулуур.
-
0
-
0
-
0
-
0
-
0
-
0
