Мунньах үлэтигэр «Үөрэхтээһин» уонна «Наука» национальнай бырайыактары олоххо киллэриигэ, үөрэтэр-чинчийэр каадырдары бэлэмнээһиҥҥэ, үөрэтэр бырагыраамалары тупсаран оҥорууга улахан болҕомто ууруллубута. Антонина Григорьева дакылаатыгар аҕыйах ахсааннаах төрүт олохтоох хотугу норуоттар истэриттэн федеральнай үрдүк үөрэх тэрилтэлэригэр үөрэнэ сылдьар устудьуоннар социальнай өйөбүллээх буолуулара сокуонунан мэктиэлэниэхтээҕин туһунан анаан бэлиэтээтэ. Социальнай төлөбүрдэр маннык устудьуоннарга Арассыыйа Федерациятын үөрэххэ уонна наукаҕа министиэристибэтигэр бас бэринэр үөрэх тэрилтэлэринэн 2006 сылтан 2016 сыл бэс ыйын 1 күнүгэр диэри төлөммүттэрэ. «Харчы, хотугу устудьуоннар кэтэр таҥаһынан, атах таҥаһынан, сымнаҕас инбэнтээринэн хааччыллалларын толуйууга анаан көрүллүбүтэ. Биир устудьуоҥҥа ыйга ортотунан 13 тыһ. солк. көрүллэрэ. Кинилэргэ бу улахан өйөбүл этэ», – диэтэ норуот дьокутаата, Ил Түмэн бэрэссэдээтэлин солбуйааччы.
Антонина Афанасьевна этиитин салгыырыгар, үөрэнэр ыччакка социальнай өйөбүлү олохтооһун Хотугу сир уонна Аартыкатааҕы зона территорияларын сайыннарыыга биир уруттата тутуллар хайысханан буолуохтааҕын бэлиэтээбитэ. Үөрэнэн, сайдан, идэ ылан бырамыысыланнаска, предприятиеларга, хампаанньаларга исписэлиистэринэн үлэлии кэлбит, төрөөбүт кыраайдарын сайыннарарга уонна харыстыырга кимтэн да ордук күүстээх дьулуһуулаах, дьиҥ хаһаайынныы өйдөөх-санаалаах ыччат кэллэҕинэ, Хотугу сир уонна Аартыка инникигэ кэскиллэрэ, эрэллэрэ кинилэр буолуох этилэр.
Антонина Григорьева бэлиэтээн эппитинэн, бүгүн өрөспүүбүлүкэҕэ «Эдэр исписэлиистэри судаарыстыбаннай унитарнай предприятиеларга уонна судаарыстыбаннай учреждениеларга, хаһаайыстыбаннай уопсастыбаларга тардар туһунан» сокуон ылыллан турар. Сокуон өрөспүүбүлүкэ Баһылыгын 2018 сыл ыам ыйын 14 күнүнээҕи ыйааҕынан бигэргэнэн турар. Сокуон, эдэр исписэлиистэр бары аахсыйалаах уонна хаһаайыстыбаннай уопсастыбаларга, судаарыстыба өлүүтэ баар судаарыстыбаннай унитарнай предприятиеларыгар уонна судаарыстыбаннай учреждениеларыгар үлэҕэ киирэллэригэр саҥа бэрээдэги олохтуур. Сокуоҥҥа олоҕуран, эдэр исписэлиистэр үлэни биэрээччилэр иллэҥ бакаансыйалаах буоллахтарына, туох мэһэйдэһиитэ суох үлэнэн хаачыллыахтаахтар.
Өрөспүүбүлүкэ норуодунай дьокутаатын этиилэрин дьүүллэһии түмүгүнэн, Федерация Сэбиэтин иһинэн Аартыка уонна Антарктика Сэбиэтин мунньаҕын быһаарыыларын бырайыагар киллэриллэн тураллар.
-
0
-
0
-
0
-
0
-
0
-
0
