Киһи төрөөрү 9 ый иитиллэн айыллыыта уонна улуу төрүттэриттэн уһуйуллан Айыллыытын туругун кэпсиир, олус ураты дьүрүскэн дорҕоонноох, тэтимнээх, сэһэннээх айар киэһээни, "Сэргэлээх уоттара" түһүлгэтигэр толору мустубут дьон иһийэн олорон көрдүбүт. Алгыс мааныта куйаартан кутуллан, ис эйгэбитинэн тэҥҥэ ыллаһан, хас биирдиибит ураты турукка киирэн ыллыбыт...
Василена Шарина-Улан хомусчут, ырыаһыт, үҥкүүһүт, блогер бары талааны айылҕата маанылаан биэрбитин, бу дьикти ураты түһүлгэҕэ көрдүбүт, сөхтүбүт, сүгүрүйдүбүт. Василена Шарина -Улан мин кинилиин сиэр-туом уһуйааныгар, дархан алгысчыт Афанасий Семенович Федоров авторскай оскуолатын 22 уһуйааныгар, көрсөн, айар үлэбитинэн билсэн, доҕордоһон бу ураты түһүлгэҕэ, биир хоһооммор саҥа ырыаны айан таһаардыбыт.
Василена Шарина-Улан бу айар кэнсиэрэ олох ураты эйгэлээх, тыыннаах. Түһүмэҕин аайы көрөччүлэрин арчылаан, алгыстаан, төрүт айылҕаларын кытта ситимнээн, хас биирдии нүөмэрэ ураты кистэлэҥнээх дьайыыта көрөөччүнү сөхтөрдө. Биир бэйэм бу түһүлгэттэн, хомус ураты дорҕоонуттан саҕалаан уйдаран, аргыый алгыс тылынан көтөхтөрөн куйаар ситимин тутан онно холбоһон, ураты сырдык сымнаҕас күүс оройум ойбонунан киирэн, хас саҥа ырыа матыыбыттан сиэттэрэн дабайдар дабайан, чэпчээн ырааһыран кэлэн, көрөөччү олбоҕор олоро түстүм. Онно көрбүтүм сыанаҕа хаар дьэргэлгэн араас өҥүнэн оонньоон, төрүт өбүгэлэрин ортотугар иирэ талахтыы имигэс кэрэ кыыс Улан турарын. Дьэ, дорҕоон дьикти күүһэ диэн уонна алгыс тыла арчылыыр, ыраастыыр күүһэ диэн бу буоллаҕа. Аар Айыылар дуу, Аан ийэ дойдубут иччитэ Аан Алахчын хотун бу түһүлгэҕэ чугаһаан ыллылар дуу...
Улан төрүт өбүгэлэрин эппит этиилэрин ылынан, уһуйуллан, ситэн, сырдаан бары чугас дьонугар, хотулуу өбүгэ аатын ылыммытын үтүөкэн түһүлгэтигэр көрөн, бары да үөрдүбүт, олус биһирээтибит.
Аныгы кэм уонна киһи айыллыбыт аатын ылыммыт туругун, тэҥҥэ көрөн-истэн дуоһуйдубут.
Чахчы, бу маннык ураты, соҕотох биир киһи дьүһүйүүтэ, көрдөрүүтэ, олоҕун олуктарыгар уһуйуллубут таһымын билиһиннэритэ, Саха Сиригэр бастакы. Бастакы хаһан баҕарар ураты, күүстээх буоларынан дьикти.
Айылҕаттан ураты таһымнаах айар дьүөгэм, бу дьикти тыыннаах, олус сонун эйгэни көрдөрөн, сөхтөрөн бу түһүлгэтигэр мустубут элбэх дьону алгыстаан, арчылаан бэйэтин ураты тэтимигэр киллэрэн ааспытыгар махтанабын!
Күндү мааны айар куттаах дьүөгэбэр, айыыһыттарын арыалларынан салҕыы бу айар тэтимин тутан, өссө элбэх көрөөччүгэ тиийэн ураты эйгэтиттэн, тэтимиттэн сомсон, айар айылҕалаах күүһүттэн бэрсэн ыраастыы, арчылыы, алгыстыы турарыгар үтүө санаабын этэбин!
ххх
Улан кыыс
(анабыл)
Улаҕалаах көрүүлээх,
Уран таһаалаах,
Ураты эйгэлээх,
Улуу төрүттэриттэн уһуйуллубут Улан дьүөгэбэр алгыс мааны тыла тиийиэхтин!
Улуу кырдьаҕастар иһиллээн,
Улуу тыл баайын иччилээн,
Ураты кэм кэлбитин кэрэһэлиир,
Улан дьүөгэбэр алгыстаах аартыктары!
Уйуһута айар эйгэ,
Уустук айыллыытын,
Ураннык тутан ылан,
Уйгулаах санаатынан,
Уруулуу дьонугар,
Уйар эйгэлээхтэригэр бэрсэ турарыгар баҕарабын!
Оннук тускуланнын!
Бээрийэ кыыһа Хотойук Айгыына,
СӨ Суруйааччыларын чилиэнэ
Хаартыскалар ааптар тиксэриитинэн
-
6
-
0
-
0
-
0
-
0
-
0
