Ол курдук, күн бүгүн от ыйын 9 күнүгэр өрөспүүбүлүкэҕэ 77 ойуур баһаара уопсайа 51 992 га иэннээх сиргэ күүдэпчилэнэ турара бэлиэтэммит. Ити Чурапчы, Мэҥэ Хаҥалас, Томпо, Мииринэй, Өлөөн, Уус Маайа, Алдан, Нерюнгри, Хаҥалас (Өлүөнэ очуос таастара), Өймөкөөн улуустарыгар.
Былырыын баччаларга 323 баһаар баарын тэҥнииллэр.
Төһө да быйыл аҕыйаҕын иһин, “Таҥара сэрэҕи сөбүлүүр”. Маныаха уоту умуорууга 486 киһи, 29 тиэхиньикэ үлэлии сылдьар.
Сөмөлүөтүнэн үрдэрэн, былыты мунньан, сөҥүүнү тохтоло суох күн аайы кэриэтэ түһэрэ сылдьаллар.
Аны туран, сорох улуустарга ардахтан уу таһыма үрдүүр. Икки хонуктааҕыта Өлүөхүмэҕэ оннук балаһыанньа бүрүүкээбит эбит буоллаҕына, бэҕэһээ Кэбээйи Сэбээн Күөлүн дьиэлэрэ ууга бара сыстылар.
Хата, киэһэтин уу түһэн саҕалаабыта. Ол да буоллар, 27 тэлгэһэҕэ киирбитэ. 58 киһини эвакуациялаан, быстах кэмҥэ олорор сиргэ көһөрбүттэрэ. Госкомобеспечение бэрэссэдээтэлин солбуйааччы Иннокентий Андросов: "Бу искусственнай ардахтартан буолбатах. Циклон кэлэрэ биллэр этэ. Зондировщик көтөр ааллар хоту өттүгэр сылдьыбаттар, Нерюнгри эҥээр үлэлииллэр", -- диэн чопчулаата.
Бүгүн Үөһээ Дьааҥы Дулгаҕалааҕар, Суордааҕар, Сартаҥар, Адыаччытыгар куттал суоһаата, хайалартан бөһүөлэккэ кута турар. Суордаахха 88 дьиэ ууга барда. 326 киһини эвакуациялыыллар. Итинтэн 20 киһитин (12 оҕо уонна 8 аҕам саастаах) улуус киинигэр Баатаҕайга илдьэллэр.
Балаһыанньаны билсэ, сүрүннүү, СӨ Бырабыыталыстыбатын бэрэссэдээтэлин солбуйааччы Дмитрий Садовников бүгүн сарсыарда бөртөлүөтүнэн Дьааҥыга көттө.
-
0
-
0
-
0
-
3
-
0
-
0
