Ол сүрүн тэрээһининэн Учууталлар уонна педагогическай уопсастыбаннас «Открытое образование – пространство возможностей» диэн XIV сийиэстэрэ буолар.
Сийиэс 7 сыл буолан баран ыытыллар. Алтынньы 4 күнүттэн саҕаламмыта, 7 күнүгэр түмүктэнэр. 400-тэн тахса дэлэгээт ыҥырыллан кэллэ.
Дэлэгээттэр үөрэх систиэмэтэ 2030 сылга диэри сайдыытын стратегиятын торумнуохтара. Биир сүрүн тиэмэнэн тиһиктээх үөрэх глобальнай экосистиэмэтин толкуйдааһын буолуоҕа.
Быйылгы сийиэс Саха АССР төрүттэммитэ 100, Үөрэҕирии норуодунай комиссариата тэриллибитэ 100, ССРС норуодунай учуутала Михаил Алексеев төрөөбүтэ 105 сылларыгар ананар.
Маны тэҥэ декада кэмигэр анал дааталары бэлиэтиэхтэрэ: балаҕан ыйын 27 күнэ – Арассыыйаҕа оскуолаҕа киириэх иннинээҕи саастаах оҕолору уһуйар педагогтар күннэрэ, алтынньы 2 күнэ – Орто анал үөрэхтээһин күнэ, алтынньы 5 күнэ – Учуутал күнэ. Онон эргиччи тоҕоостоох кэмҥэ декада ыытыллар.
Туох барыта уларыйарын тэҥэ
СӨ үөрэххэ уонна наукаҕа миниистирэ Ирина Любимова: «Сийиэс сүрүн идиэйэтэ аатыгар этиллэр «Открытое образование – пространство возможностей» диэн. Бүгүн аан дойду саҥа ис хоһоонноох уонна киэптээх үөрэхтээһин моделларын көрдөөһүҥҥэ сылдьар. Педагогтар оруоллара уларыйан иһэр, оттон үөрэҕирии оскуола уонна университет эркиннэрин иһигэр эрэ хаайтарбат, тас өттүгэр эмиэ таҕыста. Ол үөрэх тиһигэр экосистиэмэлэри уларытарга көҕүлүүр.
Сийиэс киэҥ хабааннаах бырагыраамалаах. Хас биирдии кыттааччы тус бэйэтэ сайдарыгар туһалааҕы булуо диэн эрэнэбит. Учууталлар уонна педагогическай уопсастыбаннас XIV сийиэһэ биир идэлээхтэр алтыһыыларыгар уонна уопут атастаһыытыгар улахан кылааттаах буолуоҕа.
Аныгы үөрэнээччилэр учууталлартан тугу күүтэллэрин, ирдииллэрин уонна эрэйэллэрин быһаарар ыйытынньыгы ыыттыбыт. Ол түмүгүн сийиэс кэмигэр таһаарыахпыт, олус интэриэһинэй буолуо, оҕолорбут санааларын билээри, бары да кэтэһэбит», — диэн бэлиэтээтэ.
Сийиэс чэрчитинэн араас дискуссионнай, презентационнай, сэһэргэһэр былаһааккалар, төгүрүк остуоллар, сэминээрдэр, интерактивнай аахсыйалар, үөрэҕирии технологияларын быыстапкалара, о.д.а. тэрээһиннэр ыытыллыахтара. Арассыыйа биллэр учуонайдарын лиэксийэлэрэ буолуоҕа. “100 бастыҥ уруок” баазата өссө саҥа уруоктарынан хаҥаата.
100 бастыҥҥа -- бириэмийэ
Сылын ахсын өрөспүүбүлүкэ 100 бастыҥ учууталыгар бириэмийэ туттарыллар,
Быйыл бириэмийэҕэ 305 сайаапка киирбит. Куонкурус сүрүн спонсарынан “РНГ” аахсыйалаах уопсастыба буолар. Үөрэх уонна наука министиэристибэтин, Үүнэр көлүөнэлэр пуондаларын көҕүлээһиннэринэн ыытылынна.
«Бу бириэмийэ олус туһалаах көҕүлээһин буолар. Учууталлары стимуллуурга, үөрэҕирии систиэмэтигэр киллэрбит үтүөлэрин бэлиэтииргэ, уһуйар идэ престиһин үрдэтэргэ. Сүрүн ирдэбилинэн үөрэнээччилэрин ситиһиилэрин уонна кылаас салайааччытын быһыытынан иитэр-үөрэтэр бырагыраамаларын олоххо киллэриилэрин көрдүлэр. Эспиэрдэринэн үөрэҕирии эйгэтигэр уопсастыбаннай-судаарыстыбаннай салайыы уорганнарын бэрэстэбиитэллэрэ, уопсастыбаннай тэрилтэлэр салайааччылара үлэлээтилэр», — диэн Ирина Любимова кэпсээтэ.
Үөрэҕириигэ быыстапката
«Арассыыйа – мин историям» түмэлгэ «Образование, открытое в будущее» мультимедийнай быыстапка аһылынна.
Үөрэҕирии систиэмэтигэр туһуламмыт дириҥ ис хоһооноох экспозиция маҥнайгытын турда. Өрөспүүбүлүкэ бары үөрэх тэрилтэлэрэ манна кыттыыны ыллылар. Бу күннэргэ мусуой оҕолор үөрэнэр сирдэрэ буолуоҕа, кылаас уонна тьютордар чаастара ыытыллыаҕа.
Итини сэргэ историческай паарка лекторийыгар интерактивнай ньыманан араас интэриэһинэй профориентационнай тэрээһиннэр буолуохтара. Кыттааччылар анал диагностиканы ааһан, ханнык идэҕэ барсалларын билиэхтэрэ.
Быыстапка сэттэ араас хайысханан көрдөрүлүннэ. Ол курдук, манна үөрэх инфраструктуратын сайдыытын, идэлээх үөрэхтээһини, үөрэҕирии хаачыстыбатын салайыыны, оҕолор уонна ыччаттар сайдыыларын, доруобай көлүөнэни, дойдуга бэриниилээх буолууга иитиини, наукаҕа хардыылары билсиэххэ сөп.
-
0
-
0
-
0
-
0
-
0
-
0
