Общество

Урукку өттүгэр оҕолор сатабылларын сайыннаран, оскуола иһин-таһын тупсарыыга бырайыактыыр буоллахтарына, быйыл онтубут кэҥээн, нэһилиэккэ таҕыстыбыт. Дойдубутугар туох эрэ туһалааҕы оҥордорбут диэн сыалланан-соруктанан, оҕолор араас бырайыактары олоххо киллэрэ сылдьаллар.

Бастаан бырайыактарын граҥҥа суруйарга уопуттаах ыччат, учууталлар иннилэригэр кэпсээбиттэрэ. Кинилэртэн сүбэ-ама ылан, үлэлэрин ситэрэн, аны инвестордар, биһиги нэһилиэккэ баһылыгынан үлэлээбит дьон иннилэригэр көмүскээтилэр. Дьэ, ол кэннэ үлэ күөстүү оргуйар...

Бэһис кылаастар (сал. А.Е. Андросова) дойдуларын таптыылларын биллэрэн, анал сурук оҥорторор баҕа санааларын эппиттэрэ. Билигин онно үп-харчы хомулла, матырыйаала ылылла сылдьар. Кинилэр инвестордара  Михаил Константинович Попов нэһилиэккэ управляющайынан, баһылыгынан үлэлээбит киһи, бииргэ үөрэммит оҕолорун көҕүлээн, оскуолабыт бастакы выпустара бу бырайыакка ылыстылар.

Алтыстар (сал. В.П. Иванова) 2 бырайыактаахтар. "Классики" диэннэрэ ситэн, оҕолор бэйэлэрин сыалларын ситиһэн, үөрүүлэрэ үгүс. Бу классиктарга оҕо бөҕө оонньоон, үөрэх дьылын түмүктээтилэр

Иккис бырайыактара -- сэрии толоонугар охтубут биир дойдулаахтарбыт, 4 ини-бии Поповтарга аналлаах пааматынньыгы сөргүтүү. Бу мэҥэ бэлиэ оскуола таһыгар турар. Манна сүбэһитинэн Винокуров Иннокентий Михайлович буолла. Кини бииргэ үөрэммит оҕолорун, 1973 сыллаах выпустары, пааматынньык ааптардарын, чөлүгэр түһэрэр үлэҕэ көҕүлээтэ.

“Кинилэр 50 сыл анараа өттүгэр бу пааматынньыгы туруоралларыгар эмиэ VI кылаас этилэрэ. Оччолорго кылаас салайааччыта Плотников Афанасий Мефодьевич этэ”, -- диэн инвестор Никифор Иннокентьевич Афонскай кэпсээн, ирдэбил үлэҕэ улахан көмөнү оҥордо! Ини-бии бырааттыылар Неустроев Пётр Семёнович уонна пааматынньык ааптарын уола Плотников Игорь Афанасьевич улаханнык көмөлөстүлэр. Кылаас төрөппүттэрэ бары эмиэ олус көхтөөхтүк кытыннылар!

Сэттистэр (сал. К.К. Захарова) Бэдьимэ кыраныыссатын аартыгар турар бэлиэни саҥартылар. Нэһилиэкпитигэр 10 сылы быһа таһаарыылаахтык баһылыктаабыт Фёдор Константинович уонна кэргэнэ Екатерина Прокопьевна Баишевтар дьиэ кэргэнинэн инвестордаан, анал бэлиэбит тубуста.

Оҕолор астына үлэлээтилэр, ким да туора турбата. Күүстээх үлэ кэнниттэн айылҕаҕа аһаан, арбуз амсайан, дуоһуйа кэпсэтэн, суолунан айан дьонун биһирэбилин ылан, патриотизм тыыныгар иитиллиннилэр.

Биир эмиэ олус туһалаах "Оптуобус тохтобула" бырайыагы эксээмэн быыһыгар IX кыл. үөрэнээччитэ Иванна Захарова суруйан, улахан биһирэбили ылла. Бу бырайыакка баһылык Андросов Пётр Васильевич үлэлэһиэ. Бырайыак сыала -- олохтоохтор оптуобус кэтэһэр сирдэригэр тыалтан, күнтэн, ардахтан, хаартан хаххалыыр навес оҥоруу.

Онус кылаастар (сал. Е.В. Дмитриева) бырайыактара -- оҕо оонньуур былаһааккатын реставрациялааһын. Мантан сайын кырачааннар мустар сирдэрэ тупсарылынна, кырааскаланна. Аны өссө биир саппаас чаас көрдүү сылдьаллар оҕолор...

Төрөппүттэр, ийэлэр-аҕалар, эбээлэр-эһээлэр туора турбаттар, тэҥҥэ кэлэн үлэлэһэллэр, сүбэ-ама биэрэллэр.

Ахсыс кылаастар (сал С.П. Сергучёва) волейболлуур сайыҥҥы былаһаакканы саҥардыыга бырайыактарыгар инвесторынан Попов Василий Константинович уонна 1977 сыллаах выпустар буоллулар.

Оҕолор сайыҥҥы сынньалаҥнарыгар дуоһуйа оонньуохтарын, сайдыахтарын баҕараллар. Манна үлэ эмиэ түмүктэннэ!

Онон маннык социальнай бырайыактар билиҥҥи уустук кэмҥэ оҕолорбутун патриот буоларга, тулалыыр эйгэлэригэр, дьоҥҥо-сэргэҕэ кыһалларга туһаайаллар, сатабылларын сайыннараллар, олоххо бэлэмнииллэр.

"Киһини үлэ киэргэтэр!" девиһинэн салгыы үлэлиибит!

Екатерина Попова,

Бэдьимэ, Мэҥэ Хаҥалас.