Общество

--Култуураҕа сыһыаннаах тэрээһиннэри, аптаныамыйабыт тэриллибитэ 100 сылынан - 100 тэрээһин диэн былааннаан олоробуыыстапкалар, кэнсиэрдэр, эбийиэктэр, пааматынньыктар аһыллыылара бары ол 100 тэрээһиҥҥэ киирсэллэр.

Бэҕэһээ Баһылай Баһылайабыс Никииппэрэп-Күлүмнүүр аатынан култуурабыт дыбарыаһыгар, улуустааҕы кииннэммит бибилэтиэкэ тэрийиитинэн, "Норуот эмчитэ Гурий Турантаев уонна спорт" диэн Уус Алдан успуордун кэпсиир быыстапката буолан ааста. Ону таһынан, "Умсулҕан" коллекционердар кулууптарын "Спортивнай калейдоскоп" быыстапкалара буолла. Араас улуустартан коллекционердар кэлэн, успуорка сыһыаннаах мунньууларын көрдөрөллөр. Уонна биир улахан быыстапка бүгүҥҥүттэн тэриллиэхтээх -- улууспут атыытын-тутуутун быыстапка дьаарбаҥката. Күлүмнүүр аатынан дыбарыаска маастардарбыт эталоннай үлэлэрэ көрдөрүллүөхтэрэ. Холобур, "Симэх" национальнай ускуустуба киинигэр, Хомус мусуойугар, Национальнай ойуулуур-дьүһүннүүр мусуой пуондаларыгар сытар Уус Алдантан төрүттээх маастардарбыт быыстапкаларын от ыйын 7 күнүгэр арыйыахпыт. 2013 сылга тэриллибит маастардары түмэр "Мындыр" диэн уопсастыбаннай түмсүүлээхпит. Ону култуурабыт управлениетын начаалынньыга Иннокентий Аммосов салайар. Кыл, тимир, таҥас, о.д.а. атын оҥоһуктары оҥорор араас дьоҕурдаах дьону түмэр түмсүүлэр бааллар. Саха Өрөспүүбүлүкэтин норуотун маастара диэн 20 тахса киһилээхпит. Саха Өрөспүүбүлүкэтин уус-уран оҥоһуктарга норуот маастардара диэн 30 тахса киһилээхпит.

Биһиги бүгүн Сэһэн Ардьакыап аатынан улууспут устуоруйатын, кыраайы үөрэтэр түмэли астыбыт. Бу урукку эмтиэкэ буолан, турбут дьиэни улуус бэйэтин балаансатыгар ылан сүрдээх үчүгэйдик иһиттэн-таһыттан оҥордо. Манна улуус устуоруйатын кэпсиир быыстапка арыллыаҕа. Биир дойдулаахпыт, ЯСИА фотограба Мария Васильева хаартысканан быыстапката турда.

Өлүөнэтээҕи устуоруйа-архитектура "Доҕордоһуу" заповедник мусуойа баар. Бу түмэл улуус кэрэ-бэлиэ сирдэринэн трип морсурууттары тэрийиэҕэ. Холобур, Тандаҕа Иван Готовцев арыйбыт түмэлэ баар. Дүпсүҥҥэ Күлүмнүүр аатынан кииннээхпит. Тулунанан сылдьыахтара, Суоттуга тиийиэхтэрэ. Бу экскурсионнай трип от ыйын 6-8 күннэригэр үлэлиэҕэ.

Лөгөй болуоссаппытыгар дьоҥҥо-сэргэҕэ анаан Уус Алдан улууһун уус-уран самодеятельноһын көрдөрөр кэнсиэрдэри бэлэмнээтибит. Сарсыҥҥыттан күҥҥэ үстэ - 12:00 ч., 15:00 ч., 18:00 ч. бу кэнсиэрдэр ыытыллыахтара. Холобур, сарсын 12:00 чаастан Семен Васильев-Найахы аатынан народнай ырыа-үҥкүү хоровой кэлэктиибин кэлэн көрүөххүтүн сөп. Күнүс 3 чаастан Танда уонна Түүлээх эр дьонун вокальнай кэлэктииптэрэ ыллыахтара. Уонна сарсын алта чаастан улууспут мелодистарын түмэр, Арассыыйа уонна Саха Сирин култууратын үтүөлээх үлэһитэ Василий Парников салайар "Тойон Мүрү" диэн түмсүү кэнсиэрдиэҕэ. Оонньуулар буолар күннэригэр бу курдук күн аайы народнай кэлэктииптэр айар үлэлэрин көрдөрүөхтэрэ.

Мүрү киин болуоссата, нэһилиэк дьокутааттарын сиэссийэлэрин быһаарыытынан, Лөгөй Тойон аатын сүкпүтэ. Билигин манна Лөгөй Тойон пааматынньыгын арыйаары турабыт. Бу пааматынньыгы оҥордулар: Петр Элаков, Владислав Бурцев, Владимир Левин.