«Сокровища Третьяковской галереи» быыстапка от ыйын 2 күнүттэн үлэтин саҕалаабыта. Ити кэмтэн ыла икки ый устата 15 тыһыынчатан тахса киһи аан дойду сиэдэрэй айымньыларын кэлэн көрбүт. Олортон 1100 -- оҕолор. Пушкинскай каартанан босхо сылдьыахха сөп этэ.
Ойуулуур-дьүһүннүүр национальнай түмэлгэ 50 хартыынаны уонна скульптуралары туруоралларыгар, оннооҕор мусуой ис бараанын кытта табыгастаахтык уларыппыттар. Бэл диэтэр, дьиэ иһинээҕи температураны биир таһымҥа халбаҥнаппакка тутар анал тэрили таҥан туруорбуттар. Бээ, уонна харабыл эппиэтинэһэ хас да бүк улааппыт, үлэтэ күүһүрдүллүбүт.
Түмүктүүр тэрээһиҥҥэ Третьяковскай галерея кылаабынай исписэлииһэ Татьяна Городкова кэллэ. Кини бу бырайыагы биһириирин биллэрдэ уонна, олохтоохтор көрдөһүүлэрин ылынан, балаҕан ыйын 18 күнүгэр диэри быыстапканы уһатарга сөбүлэстэ.
Юрий Куприянов, култуура миниистирэ:
-- Татьяна Городкова диэн Третьяковскай галерея кылаан хаһаайката, нууччалыы эттэххэ, кылаабынай хранитель. Улахан дуоһунастаах киһи биһиэхэ кэлэ сылдьара кэрэхсэбиллээх. Кини экспозициялар барыта сөпкө турбуттарын, быыстапка үрдүк таһымнаахтык ааспытын бэлиэтээтэ. Чопчу эттэххэ, 15 600-тэн тахса киһи кэлэн көрдө, онон Саха АССР 100 сылыгар анаммыт бырайыакпыт табылынна диэн махтаныахпын баҕарабын. Саха Сирин художественнай мусуойа уонна Третьяковскай галерея аны мантан ыла ыкса ситимнээхтик салгыы үлэлиэхтэрэ диэн эрэнэбин.
Түмэл үлэһиттэрэ хаһан да маннык ыгымнык, күн аайы көрөөччү, ыалдьыт бөҕөлөөх, өрөбүлэ суох үлэлээбиттэрин өйдөөбөттөрүн этэллэр.
«Ол эрээри иллээх кэлэктииппит бу марафону тулуйда, биэтэккэ чиэстээхтик чугаһаатыбыт. Хас чаас аайы экскурсиялар буолаллара. Биһиги мусуойбутугар баачча элбэх киһи бастакытын сырытта. Сорохтор бэйэлэрэ да билинэллэр: “Иһигэр саҥа киирэн көрдүбүт”, -- диэн. Маннык улахан, далааһыннаах быыстапка биһиэхэ маҥнайгытын ыытылынна. Бу бачыым үлэбит саҥа таһымҥа тахсарыгар үктэл буолуоҕар саарбахтаабаппын”, -- диэн кэпсээтэ Национальнай художественай мусуой генеральный дириэктэрэ Влада Тимофеева.
-
1
-
0
-
0
-
0
-
0
-
0
